ދުނިޔޭގެ މާލީ އިދާރާ (އިންޓަރނޭޝަނަލް މޮނިޓަރީ ފަންޑް) އައިއެމެއެފްގެ މެނޭޖިންގ ޑައިރެކްޓަރ ކްރިސްޓީން ލެގާރޑް އިސްތިއުފާ ހުށަހަޅުއްވައިފިއެވެ. އޭނާ އިސްތިއުފާ ދެއްވާ ތާރީޚެއް ކަމަށް ވިދާޅުވެފައި ވަނީ އަންނަ ސެޕްޓެންބަރު މަހުގެ 12 ވަނަ ދުވަހެވެ. އައިއެމްއެފް ގެ އެގްޒެކެޓިވް ބޯޑުން ވަނީ އޭނާގެ އިސްތިއުފާގެ ސިޓީ ގަބޫލު ކޮށްފައެވެ.
އިސްތިއުފާގެ ސިޓީގައި ކްރިސްޓީން ވިދާޅުވެފައި ވަނީ އިސްތިއުފާ ދެއްވީ ޔޫރަޕިއަން ސެންޓްރަލް ބޭންކްގެ ރައީސަކަށް އެކަމާނގެ ނަން ހުށަހެޅުމާ ގުޅިގެން އައިއެމްއެފަށް ފައިދާހުރީ އޭނާ އިސްތިއުފާ ދެއްވީމާ ކަމަށް ފެނިވަޑައިގަންނަވާތީ އިސްތިއުފާ ހުށަހެޅުއްވީ ކަމުގައެވެ.
އައިއެމްއެފުން ބުނެފައި ވަނީ އައި މެނޭޖިންގ ޑައިރެކްޓަރަކު އައްޔަން ކުރުމުގެ މަސައްކަތް ކަނޑައެޅިފައިވާ އުސޫލުތަކާ އެއް ގޮތަށް ކުރިއަށް ގެންދާނޭ ކަމުގައެވެ. ވަގުތީ މެނޭޖިންގ ޑައިރެކްޓަރަކަށް ހުންނަވާނީ ދޭވިޑް ލިޕްޓަން އެވެ.
ކްރިސްޓީން އައިއެމްއެފްގެ މެނޭގިންގ ޑައިރެކްޓަރަކަށް ވެވަޑައިގަތީ 2011 ވަނަ އަހަރުގެ ޖުލައި މަހުގެ 5 ވަނަ ދުވަހުއެވެ. އޭނާއަކީ ގާނޫނީ ވަކީލެކެވެ. އައިއެމްއެފާ ގުޅިވަޑައިގަތުމުގެ ކުރީން އޭނާ ވަނީ ފަރަންސޭސިވިލާތުގެ ސަރުކާރުގެ އެކި މަގާމުތައް ފުރުއްވައިފައެވެ. އޭގެ ތެރޭގައި މިނިސްޓަރ އޮފް ދި އިކޮނޮމީ، ފައިނޭންސް އެންޑް އިންޑަސްޓްރީއާއި މިނިސްޓަރ އޮފް އެގްރިކަލްޗަރ އެންޑް ފިޝިންގއާއި މިނިސްޓަރ އޮފް ކޮމާރސްގެ މަގާމު ހިމެނެއެވެ. ޔޫރަޕިއަން ސެންޓްރަލް ބޭންކްގެ ރައީސްކަމާ އޭނާ ހަވާލުވެވަޑައިގަންނަވާނީ މި އަހަރުގެ ނޮވެންބަރު މަހުގެ 1 ވަނަ ދުވަހުއެވެ.
