މި ސަރުކާރުން އެކުލަވާލެއްވި ޤައުމީ ތަރައްޤީގެ ޕްލޭން ދޮޅުމަހެއްހާ ދުވަހުގެ ތެރޭގައި އާއްމު ކުރައްވާނެ ކަމަށް ނެޝެނަލް
ޕަލޭނީން މިނިސްޓަރ މުޙައްމަދު އަސްލަމް ވިދާޅުވެއްޖެއެވެ. މިނިސްޓަރ މިކަން ހާމަކުރެއްވީ މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ތިމަރަފުށީ ދާއިރާގެ މެމްބަރ ޢަބްދުﷲ ރިޔާޒު ކުރެއްވި ސުވާލަކަށް ޖަވާބު ދެއްވަމުންނެވެ. ޤައުމީ ތަރައްޤީގެ ޕްލޭންގެ ފުރަތަ ދެލިކޮޕީ އެކުލަވާލައި ނިމި ކެބިނެޓްގައި މަޝްވަރާކުރައްވަމުން ގެންދަވާކަމަށް މިނިސްޓަރ ފާހަގަ ކުރެއްވިއެވެ. ސަރުކާރުގެ އަމާޒަކީ ކުރިއަށް އޮތް ދޮޅުމަހެއްހާ ދުވަސް ތެރޭގައި ޤައުމީ ތަރައްޤީގެ ޕްލޭން އާއްމުކުރެއްވުންކަމަށް ވިދާޅުވިއެވެ.
ޤައުމީ ތަރައްޤީގެ ޕްލޭން އާއްމުކުރެއްވުމުން މަޖިލީސް މެމްބަރުންނާއި އަދި ރައްޔިތުންނަށް ވެސް ޚިޔާލު ހުށަހެޅޭނެކަން މިނިސްޓަރ ފާހަގަ ކުރެއްވިއެވެ.
މިއަދުގެ ޖަލްސާގައި ރައްޔިތުންގެ މަޖިލީހުގައި ވަޒީރާ ސުވާލުކުރެއްވީ އައްޑު އަތޮޅު މަރަދޫ ބަނދަރުގެ މަސައްކަތާ ބެހޭ ގޮތުން އެ ދާއިރާގެ މެމްބަރ އިބްރާހީމް ޝަރީފެވެ. އެ ސުވާލަށް ފަހު އެހެން މެމްބަރުން ކުރެއްވި ސުވާލުތަކަށް ވެސް މިނިސްޓަރ ވަނީ ޖަވާބު ދެއްވައިފައެވެ.
މަރަދޫ ދާއިރާގެ މެމްބަރ ސުވާލަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ ބަނދަރުގެ މަސައްކަތް ހުށްޓިފައި ވަނީ ސިޓީ ކައުންސިލުން އެދުނު ގޮތަށް ބައެއް ބަދަލުތައް ބަނދަރަށް ގެންނަން ޖެހުމުން ކަމަށެވެ. ސިޓީ ކައުން ސިލުން އެދިފައިވާ ކަންކަމުގެ ތެރޭގައި ހަބަރ ބޭސިން ފުޅާކޮށްދިނުމާއި ކަނޑު ތޮށީގެ އެތެރެއިން އުޅަނދުފަހަރު ބަނދަރު ކުރެވޭ ގޮތަށް ކީވޯލެއް ލައިދިނުން ހިމެނެއެވެ. މިބަލުތައް ގެނައުމަށް ބަނދަރުގެ މަސައްކަތް ހުއްޓާލެވިފައި މިދިޔަ މާރޗްމަހުގެ 10 ވަނަ ދުވަހުކަން މިނިސްޓަރ ފާހަގަ ކުރެއްވިއެވެ.
ކަނޑުތޮށީގެ އެތެރެއިން އުޅަނދުފަހަރު ބަނދަރު ކުރެވޭގޮތަށް ކީވޯލެއް ލުމަށްޓަކައި 100 ފޫޓް ބަދަނރަށް އިތުރުކުރުމުން ބަނދަރުގެ މިހާރުގެ ފުޅާމިނަކީ 400 ފޫޓުކަން މިނިސްޓަރ ފާހަގަ ކުރެއްވިއެވެ. ގެނެވުނުއެބަދަލުތަކާއެކު ބަނދަރުގެ އަގަށް ވެސް ބަދަލު އައިސްފައި ވުމުން ކުރީގެ އެއްބަސްވުން އުވާލާ އެމްޓީސީސީ އާއެކު ދިޔަ މަހުގެ 30 ވަނަ ދުވަހު އާ އެއްބަސްވުމެއްގައި ސޮއި ކޮށްފައިވާ ކަމަށް ވިދާޅުވިއެވެ.
ބާކީ ނުކުރެވި ހުރި މަސައްކަތާއި އަލަށް ޙަވާލު ކުރެވުނު މަސައްކަތާއެކު ބަނދަރުގެ އަގު 28 މިލިއަން ރުފިޔާއަށް އަރާކަމަށް މިނިސްޓަރ ފާހަގަ ކުރެއްވިއެވެ. ތިމާވެށްޓާ ބެހޭ ޤާނޫނުގައި ބުނާގޮތުން ބަނދަރަށް ގެނެވުނު ބަދަލުތަކާ ގުޅިގެން، އީއައިއޭ އިން އެޑަންޑަމެއް ހަދަން ޖެހޭކަން ފާހަގަ ކުރައްވައި އެކަމަށް 30 ދުވަހުގެ މުއްދަތެއް ދެވިފައިވާ ކަން މިނިސްޓަރ ފާހަގަކުރެއްވިއެވެ. ބާރަށް މަސައްކަތް ކުރިއަށް ދާނީ އެ އެޑަންޑަމް އެޕްރޫވުމުން ކަމަށް މިނިސްޓަރ ވިދާޅުވިއެވެ.
