ނައިޖީރިޔާގެ އިރިއުތުރުގައި ތިން މީހަކު އެއް ފަހަރާ ޖާނުން ފިދާވެގެން ދިން ބޮމުގެ ހަމަލާއެއްގައި 30 މީހުން މަރުވެއްޖެއެވެ. ބެލެވޭ ގޮތުގައި މި ހަމަލާގެ ފަހަތުގައި ވަނީ ހަރުކަށި އިސްލާމީ ހަނގުރާމަވެރި ޖަމާއަތް ބޯކޯ ހަރާމެވެ.
ތިން މީހުން ބޮން ގޮއްވާލާފައި ވަނީ އިރުއުތުރުގެ ބޯނޯ ސްޓޭޓްގެ ވެރިރަށް މައިޑުގުރީއާ 38 ކިލޯމީޓަރު ދުރުގައި އޮންނަ ކޮންޑޫގާގައެވެ. ބޮން ގޮއްވާފައި ވަނީ ޓީވީން ފުޓުބޯޅަ މެޗެއް ބަލަން ބަޔަކު ތިބި ހޯލެއްގެ ބޭރުގައެވެ.
"ހަމަލާގެ ސަބަބުން މަރުވި މީހުންގެ އަދަދު ވަނީ 30 އަށް އަރާފައި. ޒަޚަމްވެފައި ތިބި 40 މީހުން އެބަތިބި." ސްޓޭޓް އެމަޖެންސީ މެނޭޖްމަންޓް އެޖެންސީ (ސެމާ) ގެ ހެޑް އޮފް އޮޕަރޭޝަންސް އުސްމާން ކަޗައްލާ ވިދާޅުވިއެވެ.
އެ ރަށުގެ ސެލްފް ޑިފެންސް ގްރޫޕްގެ ވެރިޔާ އަލީ ހަސަން ބުނި ގޮތުގައި މި ހަމަލާ ދީފައި ވަނީ ރޭ ނައިޖީރިޔާ ގަޑިން 9 ޖެހިއިރު (ރާއްޖޭ ގަޑިން ރޭގަނޑު 11 ޖެހިއުރި) އެވެ.
ބޮން ގޮއްވާލި އެކަކު ހޯލުތެރެއަށް ވަންނަން އުޅުމުން އެތަނުގެ ވެރި ފަރާތުން އެކަމަށް ހުރަސް އެޅުމަށް ފަހު ހިނގި ޒުވާބެއްގެ ތެރޭގައި އޭނާ ބޮން ގޮއްވާލީއެވެ. އަނެއް ދެ މީހުން ބޮން ގޮއްވާލާފައި ވަނީ އެ ހޯލާ ކައިރީގައި ހުރި ކެފޭއެއްގައެވެ. އެ ތިން މީހުން ވެސް ތިބީ ގައިގާ ބޮން ހަރުކޮށްގެންނެވެ.
އަލީ ހަސަން ބުނި ގޮތުގައި މަރުވި ގިނަ މީހުންނަކީ ހޯލުން ބޭރުގައި ތިބި މީހުންނެވެ. "9 މީހުން ވަގުތުން މަރުވި، އޭގެ ތެރޭގައި ހޯލުގެ ވެރިފަރާތްވެސް ހިމެނޭ." އަލީ ހަސަން ވިދާޅުވިއެވެ.
އެއްވެސް ފަރާތަކުން އަދި މި ހަމަލާގެ ޒިންމާ އުފުލާފައި ނުވިނަމަވެސް، މިފަދަ ހަމަލާތައް ނައިޖީރިޔާގައި އާއްމުކޮށް ދެނީ ބޯކޯ ހަރާމުންނެވެ.
