ކުށްވެރިން ޗައިނާއާއި ހަވާލުކުރެވޭ ގޮތަށް ހޮންކޮންގުގެ ގާނޫނަށް ގެންނަށް އުޅުނު އިސްލާހާ ގުޅޭގޮތުން އަމަލުކުރެއްވުނު ގޮތާމެދު ހިތާމަކުރައްވައި، ހޮންކޮންގުގެ ޗީފް އެގްޒެކަޓިވް ކެރީ ލޭމް ރައްޔިތުންގެ ކިބައިން މާފަށް އެދިވަޑައިގެންފިއެވެ. އެހެންނަމަވެސް، ރައްޔިތުންގެ ގިނަ ބަޔަކު އެދެމުންދަގޮތަށް އެ އިސްލާހު އަނބުރާ ގެންނަވަން އޭނާ އެއްބަސްވެވަޑައި ނުގަންނަވައެވެ.
"ސަރުކާރުގެ މަސައްކަތްތަކުގައި ހުރި އުނިކަންކަމުގެ ސަބަބުން ހޮންކޮންގުގުއި ބޮޑެތި ހަމަނުޖެހުންތަކާއި، ދެބަސްވުންތައް އުފެދި، ރައްޔިތުންގެ ތެރެއިން ގިނަ ބައެއްގެ ހިތްހަމަނުޖެހުމާއި ހާސްކަން އިތުރުވާން ދިމާވިކަން ޗީފް އެގްޒެކަޓިވް ކެރީ ލޭމް ގަބޫލުކުރައްވާ." އޭނާގެ އޮފީހުން ނެރުނު ބަޔާނެއްގައި ވެއެވެ.
"ޗީފް އެގްޒެކަޓިވް ރައްޔިތުންގެ ކިބައިން މާފަށް އެދިވަޑައިގަންނަވާ. އަދި އަދި ފާޑުކިއުންތައް އިޚްލާސްތެރިކަމާ، ހިތްތިރިކަމާއެކީ ގަބޫލުކުރައްވާނެކަމަށް ވައުދުވެވަޑައިގަންނަވާ." ބަޔާނުގައި އިތުރަށް ވެއެވެ.
ކުށްވެރިން ޗައިނާއާ ހަވާލުކުރެވޭ ގޮތަށް ގާނޫނަށް އިސްލާހުގެނައުމުގެ ބިލް ގަނޫނުހަދާ މަޖިލިސް، ލެޖިސްލޭޓިވް ކައުންސިލަށް ހުށަހެޅުމާއެކު، މިލިއަނަކަށްވުރެ ގިނަ މީހުން ނުކުމެ މުޒާހަރާކުރިއެވެ. އެހެންނަމަވެސް، ކެރީ ލޭމް ނިންމެވީ މުޒާހަރާކުރާ މީހުންގެ އަޑު ނާއްސަވައި، ގާނޫނު އިސްލާހުކުރެއްވުމާއިގެން ކުރިއަށް ވަޑައިގަންނަވާށެވެ. އިސްލާހާ ގުޅިގެން އަމަލުކުރެއްވުނު ގޮތާމެދު "ފުން ހިތަމައާއި، ހިތްދަތިކަން" ލިބިވަޑައިގެންނެވި ކަމަށް ވިދާޅުވިޔަސް، އޭނާ އަދިވެސް ބާރުލައްވައި ވިދާޅުވަނީ ގާނޫނަށް އެ އިސްލާހު ގެނައުން ކޮންމެހެން ބޭނުން ކަމުގައެވެ.
މި މަހުގެ 12 ވީ ބުދަ ދުވަހު އެ ބިލަށް ގާނޫނުހަދާ މަޖިލީހުގައި ބަހުސްކުރަން ހަމަޖެހިފައި ވަނިކޮށް، އެ ދުވަހު ރައްޔިތުން ނުކުމު މުޒާހަރާކޮށް، މުޒާހަރާ ބޮޑު ހަމަނުޖެހުމަކަށް ބަދަލުވެ އެތައް ބަޔަކަށް ބޮޑެތި އަނިޔާތަކެއް ލިބުމާ ގުޅިގެން، ކެރީ ލޭމްގެ މުސްތަޝާރުންގެ ލަފާގެ މަތިން އޭނާ ނިންމެވީ ބިލަށް ބަހުސްކުރުން ލަސްކޮށްލުމަށެވެ. އަނބުރާ ނުގެންދަވައެވެ.
އެހެންކަމުން، އިއްޔެ ހޮންކޮންގުގެ މަގުތަކަށް 2 މިލިއަނެއްހާ މީހުން ނުކުމެ ބިލް އަނބުރާ ގެންދިއުމަށާއި، ކެރީ ލޭމް އިސްތިއުފާދެއްވުމަށް ގޮވާލާފައި ވެއެވެ. މުޒާހަރާކުރި އެކަކު އެ ބިލް ސިފަކުރީ ރައްޔިތުންގެ މެއަށް ހެރި ވަޅިއެއްގެ ގޮތުގައެވެ. އޭނާ ބުނިގޮތުގައި ރައްޔިތުން ނުކުމެ މުޒާހަރާކުރުމުން އެ ވަޅި އިތުރަށް ނަހަރައި ހުއްޓާލީއެވެ. އެހެންނަމަވެސް، އެ ވަޅި އަދިވެސް ރައްޔިތުންގެ މެއިން ނުނަގައެވެ.
ޗީފް އެގްޒެކަޓިވް މާފަށް އެދިވަޑައިގަތަސް މުޒަހާރާކުރަން މަގުމައްޗަށް ނުކުމެތިބި މިލިއަނުން ގުނާލެވޭ މީހުން ތިބީ ހުއްޓާލާ ގޮތަކަށް ނޫނެވެ.
"އަހަރުމެން އެދޭ ކަންތައް ވަރަށް ސާފު. ކެރީ ލޭމް މަގާމު ދޫކުރައްވައި ވަޑައިގަންނަވާ. ކުށްވެރިން ހަވާލުކުރުމާ ބެހޭ ބިލް ޖެހޭނީ އަނބުރާ ގެންނަން. ރައްޔިތުންނާ ދެކޮޅަށް އާދަޔާ ޚިލާފު ބާރު ބޭނުންކޮށްފައި ވާތީ ފުލުހުން ޖެހޭނީ މާފަށް އެދެން." މުޒާހަރާގެ ބައިވެރިއަކު ބުންޏެވެ.
"އަހަރުމެން ހުއްޓާ ނުލާނަން." އޭނާ އިތުރަށް ބުންޏެވެ.
އާދީއްތަ ދުވަހު (އިއްޔެ) ގެ ބިޔަ މުޒާހަރާއަށް ފަހު ހޯމަ ދުވަހު (މިއަދު) ވެސް މުޒާހަރާ ކުރިއަށް ދާނެކަމަށް ވެއެވެ.
