ސްރީލަންކާގެ ސިފައިންގެ ކުރީގެ ވެރިޔާ ފީލްޑް މާޝަލް (ރިޓާޔަޑް) ސަރަތު ފޮންސޭކާ ލޯ އެންޑް އޯޑަރ މިނިސްޓަރުކަމަށް އައްޔަންކުރެއްވުމަށް އެދިވަޑައިގެން އެގައުމުގެ ގާނޫނުހަދާ މަޖިލީހުގެ 98 މެންބަރަކު ރައީސު މައިތުރިޕާލާ ސިރިސޭނާއަށް ޕެޓިޝަނެއްގައި ސޮއިކުރައްވައިފިއެވެ.
ސްރީލަންކާގެ ނޫހަކަށް މައުލޫމާތުދެއްވަމުން ގާނޫނުހަދާ މަޖިލީހުގެ ޔުނައިޓެޑް ނޭޝަނަލް ޕާޓީ (ޔޫއެންޕީ) އަށް ނިސްބަތްވާ މެންބަރު އަޝޫ މަރަސިންހޭ ވިދާޅުވީ، ޔުނައިޓެޑް ނޭޝަނަލް ފްރަންޓު (ޔޫއެންއެފް) ގެ ސަރުކާރަށް ނިސްބަތްވެވަޑައިގަންނަވާ 98 މެންބަރަކު ސޮއިކުރައްވާފައިވާ ޕެޓިޝަން ގާނޫނުހަދާ މަޖިލީހުގައި ރައީސު ސިރިސޭނާއަށް ހުށަހެޅޭނެކަމަށް އުއްމީދުކުރައްވާ ކަމުގައެވެ.
"ޕެޓިޝަން ހުށަހެޅުމަށް ރައީސު ރަސްމީ އެޕޮއިންޓްމަންޓެއް ދެއްވާފައި ނުވޭ. އެހެންނަމަވެސް، ވަޒީރުންގެ މަޖިލީހުގެ ޖަލްސާގައި ބައިވެރިވެވަޑައިގަތުމަށް އަންގާރަ ދުވަހު ރައީސު ގާނޫނުހަދާ މަޖިލީހުގެ އިމާރާތަށް ވަޑައިގެން އުޅުއްވާއިރު ޕެޓިޝަން ހަވާލުކުރެވޭނެކަމަށް އުއްމީދުކުރަން." އޭނާ ވިދާޅުވިއެވެ.
ސަރަތު ފޮންސޭކާއަކީ ކުރީގެ ރައީސު މަހިންދަ ރާޖަޕަކްސާގެ ވެރިކަމުގައި ތަމަޅަ ހަނގުރާމަވެރިން ބަލިކޮށް، 18 މޭ 2009 ގައި ރަސްމީކޮށް އެކަން އިއުލާންކުރިއިރު ސްރީލަންކާގެ އެއްގަމު ސިފައިންގެ ކޮމާންޑަރެވެ. ތަމަޅަ ހަނގުރާމަވެރިން ބަލިކުރުމުގައި އޭނާ އަދާކުރެއްވި ދައުރުގެ ސަބަބުން އެގައުމުގެ ގިނަ ބަޔަކު ދެކެނީ އޭނާއަކީ ގައުމީ ބަޠަލެއް ކަމުގައެވެ. ހަނގުރާމަ ނިމުމަށް ފަހު ޖުލައި 2009 އިން ނޮވެންބަރު 2009 އަށް ސްރީލަންކާގެ ޗީފް އޮފް ޑިފެންސް ސްޓާފްގެ މަގާމު އޭނާ ފުރުއްވާފައި ވެއެވެ. އެއަށްފަހު، އޭނާވަނީ ސިފައިންގެ ވަޒީފާ ދޫކުރައްވައި މަގާމުން އިސްތިއުފާދެއްވާފައެވެ.
ލޯ އެންޑް އޯޑަރ މިނިސްޓަރުކަމަށް ސަރަތު ފޮންސޭކާ އައްޔަންކުރެއްވުމަށް އެދި ހުށަހަޅާ ޕެޓިޝަނަކީ، އޭނާއަށް މިނިސްޓަރުކަން ހޯދައިދިނުމަށް ޔޫއެންއެފުން ކުރަމުންދާ މަސައްކަތުގެ ބައެކެވެ.
ފާއިތުވި އަހަރު އޮކްޓޯބަރު މަހު، ބޮޑުވަޒީރު ރަނިލް ވިކްރަމަސިންހާ މަގާމުން ދުރުކުރައްވައި، އޭނާގެ ސަރުކާރު އުވާލެއްވުމަށް ފަހު ރައީސު ސިރިސޭނާ ވަނީ ފުލުހުން ޑިފެންސް މިނިސްޓަރީގެ ދަށަށް ގެންނަވާފައެވެ. ޑިފެންސް މިނިސްޓަރަކީ ރައީސު ސިރިސޭނާއެވެ.
ޔޫއެންއެފްގެ ބޭފުޅުން ވިދާޅުވާ ގޮތުގައި ފުލުހުން ޑިފެންސް މިނިސްޓްރީގެ ދަށުގައި ބޭތިއްބުމަކީ ގާނޫނު އަސާސީއަށް ގެނެވުނު 19 ވަނަ އިސްލާހުން މަނާކޮށްފައިވާ ކަމެކެވެ. އެހެންކަމުން، އެބޭފުޅުން އެދިވަޑައިގަންނަވަމުން ގެންދަވަނީ ފުލުހުން ލޯ އެންޑް އޯޑަރ މިނިސްޓްރީގެ ދަށަށް ބަދަލުކުރައްވައި ސަރަތު ފޮންސޭކާއާއި އެމިނިސްޓްރީ ހަވާލުކުރެއްވުމަށެވެ.
