އިނގިރޭސިވިލާތުގެ ބޮޑުވަޒީރު ޓެރޭސާ މޭ އޭނާގެ ޑިފެންސް ސެކްރެޓަރީ (ދިފާއީ ވަޒީރު) ގެވިން ވިލިއަމްސަން އިއްޔެ މަގާމުން ވަކިކުރައްވައިފިއެވެ. އެއީ ގައުމީ ސަލާމަތާ ބެހޭ ކައުންސިލްގައި ކުރެވުނު ސިއްރު މަޝްވަރާތަކެއްގެ ވާހަކަ އާއްމުވުމުގެ މައްސަލައިގެ ތަހުގީގަށް ފަހުގައެވެ.
އާއްމުވެގެން އުޅެނީ ވާހަކަތަކަކީ ޗައިނާގެ މުވާސަލާތީ ކުންފުނި ހުވާވޭއާ ގުޅުންހުރި މަޝްވަރާތަކެވެ. އެއީ ޝަރުޠުތަކަކާއެކު އިނގިރޭސިވިލާތުގައި 5ޖީ ވައުގަ ތަރައްގީކުރުމުގެ ހުއްދަ ދިނުމާގުޅޭ ވާހަކަތަކެކެވެ.
"ބޮޑުވަޒީރު ވަނީ ސަރުކާރު ދޫކޮށްލެއްވުމަށް ދިފާއީ ވަޒީރަށް މިއަދު ހަވީރު އަންގަވާފަ. އެއީ ޚިދުމަތްކުރުމުގެ ގާބިލުކަން އޭނާއަށް ލިބިގެންވާކަމުގެ އިތުބާރު ބޮޑުވަޒީރަށް ނެތުމުން." ވިލިއަމްސަން މަގާމުން ދުރުކުރުމަށް ފަހު ބޮޑުވަޒީރު އޮފީސް 10 ޑައުނިންގ ސްޓްރީޓުގެ ތަރުޖަމާނު ބުނެފައި ވެއެވެ.
ވިލިއަމްސަންގެ ބަދަލުގައި ޑިފެންސް ސެކްރެޓަރީ ކަމުގެ މަގާމާ ހަވާލުވެވަޑައިގަތީ މިހާތަނަށް ސެކްރެޓަރީ އޮފް ސްޓޭޓް ފޯ އިންޓަނޭޝަނަލް ޑިވެލޮޕްމަންޓްގެ މަގާމުގައި ހުންނެވި ޕެނީ މޯރޑަންޓްއެވެ. އޭނާއަކީ އިނގިރޭސިވިލާތުގެ ފުރުތަމަ އަންހެން ދިފާއީ ވަޒީރެވެ.
2017 ވަނަ އަހަރުން ފެށިގެން ދިފާއީ ވަޒީރުގެ މަގާމުގައި ހުންނެވި ވިލިއަމްސަން ވަނީ އޭނާއާމެދު ކުރެވޭ ތުހުމަތުތަކަށް އިންކާރުކުރައްވާފައެވެ. "މި ކަމުގައި އަހަރެންގެ އެއްވެސް ދައުރެއް ވާކަމަށް އަހަރެން އިންކާރުކުރަން. އަދި އަދި ފުރިހަމަ ރަސްމީ ތަހުގީގެއް ހިންގައިފިނަމަ މިކަމުން އަހަރެން ބަރީއަވާނެ ކަމުގެ ފުރިހަމަ ޔަގީންކަން އެބައޮތް." ވިލިއަމްސަން ނެރުއްވި ބަޔާނެއްގައި ވެއެވެ.
ގައުމީ ސަލާމަތާ ބެހޭ ކައުންސިލްގައި ކުރެވުނު މަޝްވަރާތަކުގެ މައްސަލަ ތަހުގީގުކުރަން ފެށީ، އެވާހަކަ ދަ ޓެލެގްރާފު ނޫހުގައި އާއްމުކުރުމާ ގުޅިގެން، ހުވާވޭއަކު ވެވޭ އެއްބަސްވުމެއްގެ ސަބަބުން ގައުމީ ސަލާމަތަށް ނުރައްކާވެދާނެ ވާހަކަ ވަޒީރުންގެ މަޖިލީހުގައި ދެކެވުމަށް ފަހުއެވެ.
ޑެއިލީ ޓެލެގްރާފުން އެވާހަކަ އާއްމުކުރުމުގެ ކުރިން ގެވިން ވިލިއަމްސަން އެނޫހުގެ ޑެޕިއުޓީ ޕޮލިޓިކަލް އެޑިޓަރު ސްޓީވަން ސްވިންފޯޑާ އޭރު ބައްދަލުކުރެއްވިވާހަކަވެސް އާއްމުވެފައި ވެއެވެ.
ހުވާވޭ ކުންފުންޏަކީ ދުނިޔޭގެ އެންމެ ބޮޑު މުވާސަލާތީ ކުންފުންޏަށް ވާއިރު، އެ ކުންފުނީގެ ޓެކްނޮލޮޖީ ބޭނުންކޮށްގެން ޗައިނާ ސަރުކާރުން ޖާސޫސުކުރާ ކަމުގެ ތުހުމަތާއެކު، ހުވާވޭއާ ގުޅުން ބަދަހިކުރުމަކީ ޔޫރަޕާއި އެމެރިކާގައި ވަރަށް ހައްސާސު (ސެންސިޓިވް) މައްސަލައެކެވެ.
