ބައިނަލްއަގުވާމީ ގޮތުން ގަބޫލުކުރާ، އަދި އެމެރިކާވެސް ތާއީދުކުރާ ލީބިޔާގެ ގައުމީ އެއްބައިވަންތަކަމުގެ ސަރުކާރު ވައްޓާލައި ވެރިރަށް ޓްރިޕޮލީ (ޠަރާބުލުސް) ހިފުމަށް މަސައްކަތްކުރާ ހަނގުރާމަވެރި ލީޑަރު ފީލްޑް މާޝަލް ޚަލީފާ ޙަފްތަރާއި ރައީސު ޓްރަމްޕް ފޯނުން ވާހަކަފުޅުދައްކަވައިފިއެވެ.
އެމެރިކާ ތާއީދުކުރާ ސަރުކާރެއް ވައްޓާލަން މަސައްކަތްކުރާ މީހަކަށް ހުކުރު ދުވަހު ރައީސު ޓްރަމްޕް ގުޅުއްވައި "ޓެރަރިސް ޖަމާއަތްތަކާ" ހަނގުރާމަކުރުމަށް ޙަފްތަރުކުރާ މަސައްކަތަށް ތައުރީފުކުރެއްވި ވާހަކަ ވައިޓް ހައުސްއިން ބުނުމުން އެމެރިކާގެ ސިޔާސީ ގިނަ ފަރާތްތަކަކަށް ވަނީ ހައިރާންކަން ލިބިފައެވެ.
ވައިޓް ހައުސްގެ ބަޔާނުގައި ވާގޮތުން ރައީސު ޑޮނާލްޑް ޓްރަމްޕް ފީލްޑް މާޝަލް ޚަލީފާ ޙަފްތަރަށް ގުޅުއްވީ ޓެރަރިޒަމާ ދެކޮޅަށް ކުރާ މަސައްކަތާއި، ލީބިޔާގައި ސުލްހަ ގާއިމުކުރުމަށް ކުރެވޭ މަސައްކަތާއި ބެހޭގޮތުން މަޝްވަރާކުރެއްވުމަށެވެ.
"ޓެރަރިޒަމާއި ހަނގުރާމަކުރުމާއި، ލީބިޔާގެ ތެލުގެ ވަސީލަތްތައް ދިފާއުކުރުމުގައި ހަފްތަރު އަދާކޮށްފައިދާ ދައުރު މުހިއްމުކަން ރައީސު ޓްރަމްޕް ގަބޫލުފުޅުކުރެއްވިއެވެ. އަދި ލީބިޔާ ހަމަޖެހޭ ޑިމޮކްރެޓިކް ސިޔާސީ ނިޒާމަކަށް ބަދަލުކުރުމާމެދު އެއްބަސްވެވޭ ގޮތަކާމެދު ދެބޭފުޅުން މަޝްވަރާކުރެއްވިއެވެ." ވައިޓް ހައުސްގެ ބަޔާނުގައި ވެއެވެ.
ލީބިޔާގެ މައްސަލައިގައި ކުރިއަށް ދާންވީ ގޮތެއް ކަނޑައަޅައި، ހަނގުރާމަކުރާ ދެ ފަރާތަށް ހަނގުރާމަ ހުއްޓާލުމަށް ގޮވާލާ ގަރާރެއް ފާސްކުރުމަށް އދ. ގެ ސަލާމަތީ މަޖިލީހުގައި ބުރާސްފަތި ދުވަހު ކުރެވެނު މަސައްކަތް ވަނީ ނާކާމިބުވެފައެވެ. ސަބަބަކަށް ވީ ހަފްތަރު ކުށްވެރިކޮށް އިނގިރޭސިވިލާތުން ހުށަހެޅި ގަރާރަށް އެމެރިކާއާއި ރަޝިޔާ ދެކޮޅު ހެދުމެވެ.
ކާނަލް މުޢައްމަރު އަލްޤައްޒާފީގެ ވެރިކަން ވައްޓާލިފަހުން ލީބިޔާގައި އައީ ވަކި ދެ ސަރުކާރެއް ހިނގަމުންނެވެ. އދ. ން އަދި ދުނިޔޭގެ ގިނަ ގައުމުތަކުން ގަބޫލުކުރަނީ ވެރިރަށް ޓްރިޕޮލީގައި ގާއިމުވެފައި އޮތް ގައުމީ އެއްބައިވަންތަކަމުގެ ސަރުކާރެވެ.
ޤައްޒާފީގެ ވެރިކަމުގައި ސިފައިންގެ ފީލްޑް މާޝަލަކަށް ހުރި ޚަލީފާ ހަފްތަރު ވަނީ ގައްޒާފީއާ ޖެހުނު މައްސަލަތަކެއްގައި ގައުމު ދޫކޮށް އެމެރިކާއަށް ގޮސް އެތަނުގައި ވަޒަންވެރިވެފައެވެ. އަދި އެތާނގެ ރައްޔިތަކަށްވެސް ވެފައެވެ. ޤައްޒާފީގެ ވެރިކަން ނިމުމަކަށް އައުމުން އޭނާ ވަނީ ލީބިޔަން ނޭޝަނަލް އާމީގެ ނަމުގައި ލަޝްކަރެއް އުފައްދައި މުޅި ލީބިޔާއަށް އަތްގަދަކުރުމުގެ މަސައްކަތް ފަށާފައެވެ. މިކަމުގައި މިސްރާއި، ޔޫއޭއީއާއި، ސައޫދީ އަރަބިއްޔާ ދަނީ ފާޅުގައި އޭނާއަށް އެހީވަމުންނެވެ.
އެމެރިކާއާއި ފްރާންސުން ލީބިޔާގެ ގައުމީ އެއްބައިވަންތަކަމުގެ ސަރުކާރަށް ތާއީދުކުރާ ސިޔާސަތެއް ގެންގުޅުނު ނަމަވެސް، އެ ދެ ގައުމުންވެސް ސިއްރުގައި ހަފްތަރަށް އެހީތެރިވާ ކަމަށްވެއެވެ. މިއީ ފާޅުގައި އެމެރިކާގެ ވެރިއަކު ހަފްތަރަށް ތާއީދުކުރި ފުރަތަމަ ފަހަރެވެ.
