ސީރިޔާ އަތުން ގަދަބާރުން ހިފައި، އިސްރާއީލުން އަމިއްލަކޮށްގެން އުޅޭ ޖޫލާނުގެ އުސްބިންތަކުގެ އާބާދީއަށް ޔަހޫދީން އިތުރުކުރުމަށް އިސްރާއީލުން ރާވާފައިވާކަން އިސްރާއީލުގެ ނޫހަކުން ހާމަކޮށްފިއެވެ.
ހާއާރެޓްޒް ނޫހުން ބުނިގޮތުގައި އިސްރާއީލުގެ މިނިސްޓްރީ އޮފް ކޮންސްޓްރަކްޝަނުން ރާވާފައި ވަނީ ޔަހޫދީންނަށް ޖޫލާނަށް ހިޖުރަކުރުމަށް ހިތްވަރު ދިނުމަށެވެ. އަދި އެތައްހާސް ބަޔަކު އެތަނުގައި ވަޒަންވެރިކުރުވުމަށެވެ. އެ ނޫހުން ހާމަކުރި ގޮތުގައި 2048 ވަނަ އަހަރާ ހަމައަށް 2 ލައްކަ 50 ހާސް ޔަހޫދީން ޖޫލާނުގެ އުސްބިންތަކުގައި އާބާދުކުރެވޭ ވަރަށް ގެތައް އިމާރާތްކުރާނެއެވެ.
ޖޫލާނުގައި އިސްރާއީލުން ގާއިމުކޮށްފައިވާ ޔަހޫދީ އާބާދީއެއްކަމުގައިވާ ކަޓްޒްރިންގެ މޭޔަރު ޑިމްޓްރީ އަޕަރްޓްޒޭވް ބުނީ އިސްރާއީލުން ރާވާފައި ވާގޮތުން ކައިރި މުސްތަގުބަލެއްގައި ޖޫލާނުގެ އާބާދީ 1 ލައްކަ 50 ހާހަށް އަރާނެއެވެ. އޭރުން ޔަހޫދީ އާބާދީ 1 ލައްކައަށް އަރާއިރު، ސީރިޔާގެ ދުރުޒީންގެ އާބާދީގައި ތިބޭނީ 50 ހާސް މީހުންނެވެ.
އަޕަރްޓްޒޭވް ލަފާކުރި ގޮތުގައި ކަޓްޒްރިންގެ އާބާދީވެސް 8500 އިން 50 ހާހަށް އިތުރުވާނެއެވެ.
ޖޫލާނުގައި ޔަހޫދީ އާބާދީ ކުއްލިއަކަށް އިތުރުކުރުމުގެ ރޭވުންތައް އިސްރާއީލުން ހާމަކޮށްފައި މިވަނީ އެމެރިކާއިން ޖޫލާނުގެ އުސްބިންތަކަކީ އިސްރާއީލުގެ ސަރަހައްދެއްކަމަށް ގަބޫލުކުރި ފަހުން ހަފުތާއެއްވެސް ނުވަނީހެވެ. އެމެރިކާގެ މި ނިންމުން ކުށްވެރިކޮށް ޓިއުނީޝިޔާގައި ނިމިގެންދިޔަ އަރަބި އެންމެ އިސްވެރިންގެ ބައްދަލުވުމުން ގަރާރު ފާސްކުރި ނަމަވެސް އެކަމާ ދެކޮޅަށް އަރަބިންނަށް އަމަލީ ފިޔަވަޅެއް އެޅިފައި ނުވެއެވެ.
އިސްރާއީލުގެ ރަސްމީ ރޭޑިޔޯއިން ބުނިގޮތުގައި މިނިސްޓްރީ އޮފް ހައުސިންގއާއި، ޖޫލާނުގެ ރީޖަނަލް ކައުންސިލާއި ކަޓްޒްރިންގެ ކައުންސިލް ގުޅިގެން ތައްޔާރުކޮށްފައިވާ ޕްލޭނުގެ ދަށުން ކަޓްޒްރިންގައި 30 ހާސް ހައުސިންގ ޔުނިޓު ބިނާކުރާނެއެވެ. އަދި އިތުރު ދެ އާބާދީއެއް ބިނާކޮށް 45 ހާސް ވަޒީފާގެ ފުރުސަތު ފަހިކޮށްދޭނެއެވެ.
މޭޔަރު އަޕަރްޓްޒޭވް އުއްމީދުކުރަނީ އެމެރިކާއިން ޖޫލާނަކީ އިސްރާއީލުގެ ބައެއް ކަމަށް ގަބޫލުކުރުމާ ގުޅިގެން އެ ސަރަހައްދަށް އަންނަ ބޭރުގެ އިންވެސްޓްމަންޓްތައް އިތުރުވާނެ ކަމަށެވެ.
ޖޫލާނުގެ މިހާރުގެ އާބާދީއަކީ 40 ހާހެވެ. އޭގެ ތެރޭން %50 އަކީ ސީރިޔާގެ ދުރުޒީންނެވެ.
