އޭނާއާ ދެކޮޅަށް ފާއިތުވި ދެ އަހަރު ހިންގާފައިވަނީ "ޣައުރު ގާނޫނީ" ތަހުގީގެއް ކަމަށާއި، އެ ތަހުގީގު ފޭލްވެފައިވާކަމަށް އެމެރިކާގެ ރައީސު ޑޮނާލްޑް ޓްރަމްޕް ސިފަކުރައްވައިފިއެވެ. އަދި އޭނާ ވިދާޅުވީ އެ ތަހުގީގު ރިޕޯޓު އައި އިރު އޭނާއާ ދެކޮޅަށް އެއްވެސް ކަމެއް ސާބިތުވެފައި ނުވާކަމުގައެވެ.
"(ރަޝިޔާއާ) ގުޅިގެން މަސައްކަތްކޮށްފައިނުވޭ، އަދި (އަދުލު އިންސާފަށް) ހުރަސްއަޅާފައި ނުވޭ" އޭނާ ކުރެއްވި ޓްވީޓެއްގައި ވިދާޅުވެފައި ވެއެވެ.
ރައީސު ޓްރަމްޕްގެ މިވާހަކަފުޅު އައިސްފައި މިވަނީ 2106 ވަނަ އަހަރުގެ ރިޔާސީ އިންތިޚާބުގައި ޑޮނާލްޑް ޓްރަމްޕުގެ ކެންޕޭނާ ރަޝިޔާއާ ގުޅިގެން އިންތިޚާބަށް އަސަރުފޯރުވަން މަސައްކަތް ކޮށްފައިވެތޯ ބަލަން ސްޕެޝަލް ކައުންސިލް ރޮބަޓް މުލާ ކުރެއްވި ތަހުގީގުގެ ރިޕޯޓުގެ ޚުލާސާ، އެޓާނީ ޖެނެރަލް ވިލިއަމް ބާ ކޮންގްރެސްއަށް ހުށަހެޅުއްވުމާ ގުޅިގެންނެވެ.
ވިލިއަމް ބާ ކޮންގްރެސްއަށް ހުށަހެޅުއްވި ޚުލާސާގައި ވާގޮތުން ޓްރަމްޕްގެ ކެންޕޭނުން ރަޝިޔާއާ ގުޅިގެން މަސައްކަތްކޮށްފައި ނުވެއެވެ. އަދި ރަޝިޔާއާ ގުޅިގެން އިންތިޚާބަށް އަސަރުފޯރުވުމަށް ރާވާފައިވެސް ނުވެއެވެ.
އެހެންނަމަވެސް، ރިޕޯޓުގެ ޚުލާސާއިން އެންމެ ބޮޑަށް ފާހަގަކުރެވުނު ކަމަކީ އަދުލު އިންސާފަށް ހުރަސްއަޅަން ރައީސު ޓްރަމްޕް މަސައްކަތްޕުޅުކުރެއްވި ކަމާމެދު މުލާ ގޮތެއް ނިންމަވާފައި ނުވާއިރު، އޭނާ ޓްރަމްޕް އެކަމުން ބަރީއަކުރައްވާފައި ވެސް ނުވެއެވެ.
އިދިކޮޅު ކޮންގްރެސް ޕާޓީން ދަނީ މުލާގެ ރިޕޯޓު އެކުގައި ހާމަކުރުމަށް ގޮވާލަމުންނެވެ. އެމެރިކާގެ ގާނޫނުހަދާ މަޖިލިސް، ކޮންގްރެސްގެ ޑިމޮކްރެޓިކް މެންބަރުން ދެކެވަޑައިގަންނަވާ ގޮތުން ވެރިކަމުގައި ހުންނެވި ރައީސަކާ ދެކޮޅަށް ދެ އަހަރު ދުވަހުގެ ތަހުގީގެއް ނިމޭ އިރު، އޭނާގެ މައްޗަށް ތުހުމަތުކުރެވޭ އަދުލު އިންސާފަށް ހުރަސްއެޅުން ފަދަ ބޮޑު ކުށަކުން އޭނާ ބަރީއަ ނުކޮށް އޮތުމަކީ ސީރިއަސް މައްސަލައެކެވެ. އެހެންކަމުން، ރައީސު ޓްރަމްޕް އަދުލު އިންސާފަށް ހުރަސް އެޅުއްވިތޯ ބަލަން ޖެހެއެވެ.
މުލާގެ ރިޕޯޓާ ގުޅިގެން ރައީސު ޑޮނާލްޑް ޓްރަމްޕުގެ މައްސަލަތަކަށް ނިމުމެއް އައީ ކަމަކަށް ނުބެލެއެވެ. ކޮންގްރެސް އޮތީ އެހާ ފަސޭހައިން ޓްރަމްޕަށް ދޫދޭގޮތަކަށް ނޫނެވެ.
