ރާއްޖޭގެ ކަނޑުގެ ސަރަޙައްދަށް ޤަވާޢިދާ ޚިލާފަށް ވަދެއުޅެނިކޮށް އެމްއެންޑީއެފް ކޯސްޓުގާޑުން އަތުލައިގެންފައިވާ ސްރީލަންކާގެ 4 މަސް ބޯޓުގައި ތިބި 25 މީހުންގެ ތަޙުގީގު ކުރަން ފަށައިފި ކަމަށް ފުލުހުން ވިދާޅުވެއްޖެއެވެ.
އެމްއެންޑީއެފުން މިއަދުވަނީ އެ 4 ބޯޓު މިއަދު ހުޅުމާލެއަށް ގެނެސް ފުލުހުންނާ ޙަވާލު ކޮށްފައެވެ. 4 ބޯޓުންގައި ތިބި 25 މީހުން މިހާރު ތިބީ ހުޅުމާލެ ފަޅުގައި އަޅައިފައިވާ ބޯޓުތަކުގައެވެ.
މި ބޯޓުފަހަރު އަތުލައިގެންފައިވަނީ ހއ. ކެލާގެ އިރުއުތުރުން 103 ނޯޓިކަލްމޭލު ބޭރުންނެވެ. މި 4 ބޯޓުގެ ތެރެއިން ކޯސްޓުގާޑަށް ފުރަތަމަ ފެނުނީ ދެ ބޯޓެވެ. އަނެއް ދެ ބޯޓު ފެނިފައިވަނީ ފުރަތަމަ ފެނުނު ދެ ބޯޓާއެކު ކުޅުދުއްފުށްޓަށް ދަތުރުކުރަމުން އަންނަނިކޮށެވެ.
