ރޭ ފަތިހުގެ ވަގުތެއްގައި އައްޑޫ ސިޓީ ހިތަދޫ ބޮޑުމަގުން ބައިސްކަލުގައި ދިޔަ އިންޑިއާ ފިރިހެންނަކަށް ތޫނު އެއްޗަކުން ޙަމަލާދީ ޒަޚަމް ކޮށްލައިފިއެވެ.
ރޭ ފަތިހު 4:00 އެހައިކަންހާއިރު އޭނާ ބޮޑުމަގުން ދަނިކޮށް ޙަމަލާ ދީފައިވަނީ އެމީހާގެ މޫނަށް ކަމަށް ފުލުހުން ވިދާޅުވިއެވެ. އެމީހާއަށް މިހާރު ގެންދަނީ ހިތަދޫ ރީޖަނަލް ހޮސްޕިޓަލުގައި ފަރުވާ ދެމުންނެވެ.
ހިތަދޫ ރީޖަނަލް ހޮސްޕިޓަލުން ވިދާޅުވީ އޭނާގެ މޫނަށާއި، ލޮލަށާއި، ބޮލަށާއި ކަންފަތަށް ވަނީ ޙަމަލާދީ ޒަޚަމްކޮށްފައި ކަމަށެވެ. އޭނާގެ ޙާލު ސީރިއަސް ކަމަށާއި ފަރުވާ ދެމުން ގެންދަނީ އައިސީޔޫގައި ކަމަށް ވެސް ހޮސްޕިޓަލުން ވިދާޅުވިއެވެ.
އެމީހާއަށް ޙަމަލާ ދިނީ ކޮންބައެއް ކަމާއި އަދި ކީއްވެ ކަމެއް އެނގިފައެއް ނުވެއެވެ. ފުލުހުން ގެންދަނީ މިމައްސަލަ ބަލަމުންނެވެ. މި ޙަމަލާދިން ކަމުގެ ތުހުމަތުގައި މިހާތަނަށް އެއްވެސް މީހަކު ބަންދުކޮށްފައެއް ނުވެއެވެ.
ފަހަކަށް އައިސް މާލެއާއި ރަށްރަށުގައި މާރާމާރީއާއި ފޭރުމާއި ވައްކަން ވަނީ އިތުރުވެފައެވެ.
