މިސްރުގެ ވެރިރަށް ޤާހިރާގެ އިސްލާމީ ޤަދީމީ އަވަށުގައި ހުންނަ މަޝްހޫރު އަލްޖާމިޢު އަލްއަޒްހަރު ކައިރީގައި މީހަކު ޖާނުން ފިދާވެގެން އިއްޔެ ދިން ހަމަލާއެއްގައި 3 މީހުން މަރުވެއްޖެއެވެ. މަރުވެފައި ވަނީ އަމިއްލައަށް މަރުވި މީހާއާއި ދެ ފުލުހުންނެވެ.
ޤާހިރާގެ ފުލުހުން ބުނި ގޮތުގައި ހުޅަނގު ގާހިރާގައި ސަރަހައްދު ބަލަހައްޓަމުން ދިޔަ ފުލުހުންގެ ބަޔަކަށް ހުކުރު ދުވަހު ހަމަލާދޭން އުޅުނު އެ މީހާ އަތުލައިގަނެ، ޤާހިރާގެ މެދުތެރޭގައި ހުންނަ އަލްއަޒްހަރު މިސްކިތް ކައިރިން އޭނާ ހައްޔަރުކުރަން އުޅެނިކޮށް އޭނާގެ ގައިގައި ހަރުކޮށްފައި ހުރި ގޮވާތަކެތި ގޮއްވާލީއެވެ.
"އޭނާގެ އަތުގައި ހުރި ގޮވާތަކެތީގެ ތެރެއިން އެކަތި ގޮއްވާލީ. އޭގެ ސަބަބުން އެ ޓެރަރިސްޓުމީހާ މަރުވެ، ގައުމީ ސަލާމަތީ ބާރުގެ ފުލުސް އޮފިސަރަކާއި، ޤާހިރާގެ ތަހުގީގީ ޑިޕާޓްމަންޓްގެ އޮފިސަރަކު ޝަހީދުވީ." ދާޚިލީ ވުޒާރާއިން ނެރުނު ބަޔާނެއްގައި ވެއެވެ.
އާންމުންގެ ތިން މީހަކު ޒަޚްމްވިއިރު، އޭގެ ތެރޭގައި ތައިލެންޑުގެ ކިޔަވާކުއްޖަކުވެސް ހިމެނެއެވެ. އަލްއަޒްހަރު ހުންނަ އަވަށަކީ، ހަނި ގޯޅިތައް ގިނަ، ތޮއްޖެހިފައިވާ ބާޒާރުތައް ގިނަ، ފަތުރުވެރިގެން މެދުގައި މަގްބޫލު އަވަށެކެވެ.
މިއީ ފާއިތުވި ހަތަރު ދުވަހުގެ ތެރޭގައި މިސްރުގައި ހިނގި މިފަދަ ތިންވަނަ ހާދިސާއެވެ. ފާއިތު ހުކުރު ދުވަހު ޖީޒާގައި އެއްޗެއް ގޮއްވާލާފާވާއިރު، ހޮނިހިރު ދުވަހު ފަތިހު ސީނާގެ ޗެކްޕޯސްޓަކަށް ހަތިޔާރުއެޅި ބަޔަކު ދިން ހަމަލާއެއްގައި ސިފައިންގެ 15 މީހަކު މަރުވެ ނުވަތަ ޒަޚަމްވެފައި ވާއިރު، ހަލާދިން މީހުންގެ ތެރެއިން 7 މީހަކު މަރުވެފައި ވެއެވެ.
އިޖިޕްޓް ޓުޑޭ އޮންލައިން ނޫހުން ޚަބަރުދޭ ގޮތުގައި އަމިއްލަ ހަށިގަނޑު ގޮއްވާލައިގެން މަރުވި މީހާއަކީ އުމުރުން 37 އަހަރުގެ އަލްޙަސަން ޢަބްދުﷲއެވެ. އޭނާއަކީ އަލްއަޒުހަރު ހުންނަ އަވަށުގައި ދިރިއުޅޭ މީހެކެވެ.
މިސްރުގައި ގެނައި އަސްކަރީ އިންގިލާބެއްގައި އައްސީސީ ވެރިކަމަށް ވަޑައިގަތް ފަހުން ދެވޭ މިފަދަ ހަމަލާތައް އިތުރުވުމާ ގުޅިގެން، އެގައުމުގެ ފަތުރުވެރަކަމަށް އެކަމުގެ ނޭދެވޭ އަސަރު ވަރަށް ބޮޑަށް ކޮށްފައިވާކަން ފާހަގަކުރެވެއެވެ. 2010 ވަނަ އަހަރު މިސްރަށް 14 މިލިއަން ފަތުރުވެރިން ޒިޔާރަތްކޮށްފައި ވާއިރު، 2016 ވަނަ އަހަރު މިއަދަދު ވަނީ 5.3 މިލިއަނަށް ތިރިވެފައެވެ.
