ވެނެޒުއެލާގެ އިދިކޮޅު ލީޑަރު ހުވާން ގުއާޑިއޯ ފާއިތުވި ބުދަ ދުވަހު އޭނާއަކީ އެގައުމުގެ 'ވަގުތީ ރައީސު' ކަމަށް އިއުލާންކުރެއްވި ހިސާބުން އުފެދުނު ސިޔާސީ ހަމަނުޖެހުން އަދިވެސް ނުނިމި ދަނީ ކުރިއަށެވެ. ދެ ފަރާތުންވެސް ދޫ ދީފައި ނުވާއިރު، އެގައުމުގެ އަސްކަރިއްޔާ އޮތީ ރައީސު ނިކޮލަސް މަޑޫރާގެ ފަހަތުގައެވެ. އާންމުންގެ ގިނަ ބަޔަކު ވަނީ ގުއާޑިއޯއަށް ތާއީދުކޮށް މަގުމައްޗަށް ނުކުމެފައެވެ.
ރަޝިޔާގެ ރަސްމީ ފަރާތްތަކުން ޚަބަރު ލިބޭގޮތުގައި، ބޭނުން ޖެހިއްޖަނަމަ މައްސަލަ ހައްލުކުރުމަށްޓަކައި ވެނެޒުއެލާ ސަރުކާރާއި އިދިކޮޅު ފަރާތްތަކާއި ދެމެދު މެދުވެރިއެއްގެ ބައި އަދާކުރުމަށް ތައްޔާރަށް އޮތްކަން ރަޝިޔާއިން ވަނީ އަންގާފައެވެ. ރަޝިޔާއިން ބުނި ގޮތުގައި ޒިންމާދާރުކަމާއެކު މައްސަލަ ހައްލުކުރުމަށް އެދޭ ކޮންމެ ފަރާތަކާ ވާހަކަދައްކަން ރަޝިޔާ އޮތީ ތައްޔާރަށެވެ.
އަނެއްކޮޅުން މެކްސިކޯގެ ރައީސު އަންޑްރޭސް މާނުއެލް ލޮޕޭޒް ލޮބްރާޑޯރް ވަނީ ވެނެޒުއެލާގައި ހިނގަމުންދާ ސިޔާސީ ހަމަނުޖެހުމަށް ހައްލެއް ހޯދުމަށްޓަކައި ސަރުކާރާއި އިދިކޮޅު ފަރާތްތަކާ އެކު ވާހަކަތައް ކުރިއަށް ގެންދިއުމަށް މެކްސިކޯއިން ތައްޔާރަށް އޮތްކަން ހާމަކުރައްވާފައެވެ.
ގުއާޑީއޯ އޭނާއަކީ ވަގުތީ ރައީސުކަމަށް އިއުލާންކުރެއްވުމާއެކު، ރައީސު ނިކޮލަސް މަޑޫރޯ ވިދާޅުވެފައިވަނީ، ގުއާޑިއޯ މަސައްކަތްކުރައްވަނީ އެމެރިކާގެ އެހީތެރިކަން ލިބިގެން އިންގިލާބެއް ގެންނަވަން ކަމުގައެވެ. އަދި އޭނާ ވަނީ ވަގުތުން އެމެރިކާއާ ޑިޕްލޮމެޓިކް ގުޅުން ކަނޑުއްވާލައްވާފައެވެ. މިކަމަށް ބާރުލިބިދޭ ޚަބަރެއް އިއްޔެ ވޯލްސްޓްރީޓް ޖާނަލްގައި ޝާއިއުކޮށްފައި ވެއެވެ. އެ ޚަބަރުގައި ވާގޮތުން ހުވާން ގުއާޑީއޯ އޭނާއަކީ ވަގުތީ ރައީސުކަމަށް އިއުލާންކުރެއްވުމުގެ ކުރިން އެމެރިކާގެ ނާއިބު ރައީސު މައިކް ޕެންސް ވަނީ އޭނާއާއި ފޯނުން ގުޅުއްވައި އެމެރިކާގެ ތާއީދު އޭނާއަށް އެތްކަން ހާމަކުރައްވާފައެވެ. އަދި އެމެރިކާގެ އިސް މަސްއޫލުވެރިއަކާ ހަވާލާދީ އެ ނޫހުން ބުނި ގޮތުގައި، ވެނެޒުއެލާގެ ގާނޫނު އަސާސީގައި ގާނޫނުހަދާ މަޖިލީހުގެ ރައީސަށް ގައުމުގެ ވަގުތީ ރައީސަކަށްވުމުގެ ފުރުސަތުދޭ މާއްދާގެ ދަށުން ގުއާޑިއޯ އޭނާއަކީ ވަގުތީ ރައީސު ކަމަށް އިއުލާންކުރައްވައިފި ނަމަ އެމެރިކާ އެކަން ގަބޫލުކުރާނެކަންވެސް ޕެންސްވަނީ ގުއާޑިއޯއަށް އަންގަވާފައެވެ.
ރަޝިޔާއާއި މެކްސިކޯގެ ހުށަހެޅުމާ ގުޅިން ރައީސު ނިކޮލަސް މަޑޫރޯ ވިދާޅުވީ އޭނާ ހުންނެވީ ގުއާޑިއޯއާ އެކު ވާހަކަ ދައްކަވަން ތައްޔާރަށް ކަމަށެވެ. އަނެއްކޮޅުން އިދިކޮޅު ލީޑަރު ގުއާޑިއޯ ވިދާޅުވެފައި ވަނީ މަޑޫރޯ ވެރިކަން ދޫކޮށްލައްވައިފިނަމަ އޭނާއަށް "މާފުދެއްވަން" ތައްޔާރަށް ހުންނެވި ކަމަށެވެ.
ވެނެޒުއެލާގެ މައްސަލައިގައި އދ.ގެ ސަލާމަތީ މަޖިލީހުގެ ބައްދަލުވުމެއް މިއަދު ބޭއްވުމަށް ހަމަޖެހިފައިވާއިރު އދ. އިން ވަނީ ވެނެޒުއެލާގެ މައްސަލަ ކޮންޓްރޯލް ނުކުރެވޭ ހިސާބަށް ގޯސްވެދާނެކަމުގެ އިންޒާރު ދީފައެވެ.
