ކުރީގެ ޑިފެންސް މިނިސްޓަރ ރިޓަޔަރޑް ކާނަލް އަޙުމަދު ނާޒިމް ދިރިއުޅުއްވާގެ މ. އެނިފްގައި އެމަނިކުފާނު އުޅުއްވާ ބައިން ހަތިޔާރު ފެނުނު މައްސަލަ އަލުން ބަލަށް ފުލުހުން ނިންމަވައިފިއެވެ.
ފުލުހުން ވިދާޅުވީ މިމައްސަލަ އަލުން ބަލަން ނިންމެވީ ކާނަލް ނާޒިމް އެކަމަށް އެދި ވަޑައިގެންނެވުމުން ކަމަށެވެ. "އެމައްސަލަ ޝަރީޢަތުގެ މަރުޙަލާތައް ނިމުނުގޮތުގެ ރިއާޔަތްކޮށް އެ މައްސަލައިގެ ތަޙުޤީޤު އަލުން ކުރުމަށް މޯލްޑިވްސް ޕޮލިސް ސާވިސް އިން ނިންމައިފި،" ފުލުހުން ވިދާޅުވެފައިވެއެވެ.
ނާޒިމް ވިދާޅުވެފައިވަނީ 2014 ވަނަ އަހަރު ޖެނުއަރީ 18 ގައި ރައީސް ޔާމީންގެ ސަރުކާރުން ހިންގި "ޖަރީމާ" ތަޙުޤީޤުކޮށް އެޢަމަލު ހިންގި މީހުން އިންސާފުގެ ކުރިމައްޗަށް ގެނައުމަށް ފުލުހުންގެ އިދާރާއިން މަސައްކަތް ކުރައްވަންޖެހޭނެ ކަމަށް ޤަބޫލުކުރެވޭތީ އެވާހަކަ މިމަހު 18 ވަނަ ދުވަހު ފުލުހުންނަށް ސިޓީއަކުން ދަންނަވައިފައިވާނެ ކަމަށެވެ. އޭގެ އިތުރަށް އެކްޓިން ކޮމިޝަނަރާ ބައްދަލު ކުރައްވައި އެވާހަކަތައް ތަފްސީލްކޮށް ވިދާޅުވެދެއްވައިފައިވާނެ ކަމަށް ވެސް ނާޒިމް ވިދާޅުވެފައިވެއެވެ.
