ރާއްޖެއަށް އަންނަ ފަތުރުވެރިން މޫދަށްއެރި އުޅޭއުޅުމުގައި މަރުވުމާއި، ގެނބުން ފަދަ ހިތާމަވެރި ޙާދިސާތައް ފަހަކަށް އައިސް އިތުރުވެފައިވާތީ އެމީހުންގެ ރައްކާތެރި ކަމަށް ފުލުހުން މަސައްކަތް ފަށައިފިއެވެ.
"މޫދުގައި ފަތުރުވެރިންނަށް ދިމާވާ ހީތާމަވެރި ޙާދިސާތައް ތަކުރާރުވަމުން ދިއުމާ ގުޅިގެން ފަތުރުވެރިންގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް މިހާރަށްވުރެ ހަރުދަނާ ކުރުމަށާއި އަދި މިފަދަ ޙާދިސާތައް މަދުކުރުމަށްޓަކައި ޚިދުމަތްދޭ ފަރާތްތަކާއި ސަރުކާރުގެ ކަމާބެހޭ އިދާރާތަކާ ގުޅިގެން މި ސަރވިސްގެ ފަރާތުން މަސައްކަތް ކުރަމުންދާ ވާހަކަ ދަންނަވަމެވެ." ފުލުހުން ނެރުއްވައިފައިވާ ބަޔާނެއްގައި ވެއެވެ.
މިދުވަސްވަރު މޫދޫގައި ހިތާމާވެރި ހާދިސާތައް ހިނގުން އިތުރުވެފައިވާތީ މޫދަށް އެރި އުޅުމުގައި ސަމާލު ވުމަށް ވެސް އެބަޔާނުގައި ވަނީ އިލްތިމާސް ކުރައްވައިފިއެވެ.
"މޫދަރަށް އެރިއުޅުމާއި، މޫދުގައި އެކިއެކި ކުޅިވަރުގެ ޙަރަކާތްތައް ހިންގުމުގައި ސަލާމަތީ ގޮތުން އަޅަންޖެހޭ ފިޔަވަޅުތައް އެޅުމަށާއި، ފަތުރުވެރިންނާއި ކުޑަކުދިންނާއި ޢުމުރުން ދުވަސްވީ ފަރާތްތައް މޫދަށް އެރި އުޅުމުގައި ރައްކާތެރި ކަމަށް އިތުރަށް ފަރުވާތެރިވުމަށް މި ސާވިސް އިންއިލްތިމާސް ކުރަމެވެ." ފުލުހުން ވިދާޅުވެފައިވެއެވެ.
މިދުވަސްވަރަކީ އިރުވައި މޫސުން ކަމުން އެމޫސުމުގެ ވަޔާއެކު އޮއިވަރުވެސް ބާރުވެފައިވާ ކަމަށް ވިދާޅުވެފައިވެއެވެ. އެހެން ކަމުން ކުޑަކުދިންނާއި ފަތަން ނުދަންނަ މީހުން މޫދަށް އެރިއުޅުމުގައި ވަރަށް ބޮޑަށް ފަރުވާތެރިވުމަށް ފުލުހުން އެދިވަޑައިގެންފައިވެއެވެ. އަދި ފަތުރުވެރިން މޫދަށް އެރިއުޅުމުގައި ވެސް ރައްކާތެރި ކަމަށް އަޅަންޖެހޭ ފިޔަވަޅުތައް އެޅުމަށް އިތުރަށް ސަމާލުވުމަށް ވެސް އެދިވަޑައިގެންފައިވެއެވެ.
