އިސްލާމިކް ރެސިސްޓެންސް މޫވްމަންޓް (ހަމާސް) ގެ ވެރިކަން އޮންނަ ޣައްޒާގައި ތެލުގެ ދަތިކަން ބޮޑުވެ، ސިއްހަތާ ބެހޭ ވުޒާރާއިން ހިންގާ މައި 5 ހޮސްޕިޓަލެއްގެ ޚިދުމަތް ހުއްޓާލަން ޖެހިދާނެކަމުގެ އިންޒާރު އެ ވުޒާރާއިން ދީފިއެވެ. ޣައްޒާގެ ސިއްހީ އިދާރާތަކަށް ކުރިމަތިވެފައިވާ ދަތިކަން ހައްލުނުކުރެވިއްޖެނަމަ އިންސާނީ މުސީބާތެއް ކުރިމަތިވުން އެކަށީގެންވާ ކަމުގައިވެސް އެ ވުޒާރާއިން ބުނެފައި ވެއެވެ.
ޣައްޒާ ސިޓީގެ އައްރަންތީސީ ސްޕެޝަލިޓީ ހޮސްޕިޓަލުގައި ނޫސްވެރިންނާ ބައްދަލުކުރައްވަމުން އެ ހޮސްޕިޓަރުގެ ޑިރެކްޓަރު ޚަލަފު އަބޫސަލަމިއްޔާ ވިދާޅުވިގޮތުގައި، އައްނަޞްރު ކުޑަކުދިންގެ ހޮސްޕިޓަލާއި، އައްރަންތީސީ ކުޑަކުދިންގެ ސްޕެޝަލިޓީ ހޮސްޕިޓަލާއި، ޝަހީދު މުޙައްމަދު ޔޫސުފު އައްޖާރު ހޮސްޕިޓަލާއި، ނަފްސާނީ ބަލިތަކުގެ ހޮސްޕިޓަލާއި، ލޮލުގެ ސްޕެޝަލިޓީ ހޮސްޕިޓަލަށް ކަރަންޓުދޭ ޖަނަރޭޓަރުތައް ކޮންމެ ވަގުތެއްގައިވެސް ހުއްޓާލަން ޖެހިދާނެއެވެ. އޭނާ ވިދާޅުވީ މިހާރުވެސް ބައިތުހާނޫނު ހޮސްޕިޓަލުގެ ޖެނެރޭޓަރުތައް ހުއްޓި ޚިދުމަތް މެދުކެނޑިފައިވާ ކަމުގައެވެ.
އޭނާ އިތުރަށް ވިދާޅުވި ގޮތުގައި، އެ ހޮސްޕިޓްލުތަކުގައި މަސައްކަތްކުރާ ފަންނީ މީހުންގެ ފަރާތުން ލިބޭ ރިޕޯޓުތައް ބުނާގޮތުއި، އެތަންތަނުގައި ރައްކާކޮށްފައި ހުރި ތެލުން މިހާރު ހުރީ ހުންނަންޖެހޭ މިންވަރުގެ އެންމެ %17 އެވެ. އަދި މިއީ ފިނި މޫސުން ކަމަށްވެފައި ކަރަންޓު ބޭނުންވާ މިންވަރު ވަނީ އިތުރުވެފައިކަން ވެސް އޭނާ ފާހަގަކުރެއްވިއެވެ.
އިސްރާއީލުގެ ހިސާރުގެ ސަބަބުން ޣައްޒާއަށް ބޭނުންވާ ހަކަތައިގެ ބާވަތްތައް އެތެރެ ނުކުރެވެއެވެ. އެކަމުގެ ސަބަބުން ތެލުގެ ދަތިކަން ދިމާވެފައިވާތީ ޣާއްޒާގެ ގެތަކަށް މިހާރުވެސް ކަރަންޓު ދެނީ 8 ގަޑިއިރު ދީފައި 8 ގަޑިރު ކަނޑާ ގޮތަށެވެ.
ޣައްޒާގެ ސިއްހަތާ ބެހޭ ވުޒާރާއިން ބުނާ ގޮތުގައި ޣައްޒާގެ ހޮސްޕިޓަލުތަކަށް ކަރަންޓު ދިނުމަށް ބޭނުންކުރާ ޖެނެރޭޓަރުތަކަށް މަހަކު 4 ލައްކަ 50 ހާސް ލިޓަރުގެ ތެޔޮ ބޭނުންވެއެވެ.
އަނެއްކޮޅުން، ޣައްޒާއިން އިސްރާއީލަށް ރޮކެޓު ހަމަލާ ދީފައިވާތީ އެކަމަށް ބަދަލުހިފުމުގެ ގޮތުން އިސްރާއީލުން ހިފަހައްޓާފައި ހުރި ޣައްޒާގެ މުވައްޒަފުންގެ މުސާރަދިނުމަށް ބޭނުންވާ ފައިސާ މިހާރު ދޫކޮށްލައިފި ކަމަށް ޚަބަރު ލިބެއެވެ.
އިސްރާއީލުން ދެ ހަފުތާ ވަންދެން އެ ފައިސާ ހިފެހެއްޓުމަށް ފަހު ދޫކޮށްލާފައިވީ ޤަޓަރުގެ މަންދޫބަކު މިހާރު ވަނީ ޓެލްއަވީވަށް ގޮހެވެ. އޭނާ އެ ފައިސާ ހިފައިގެން ޓެލްއަވީވުން ޣައްޒާއަށް ދާނެއެވެ.
ޤަޠަރުން ޣައްޒާގެ ސަރުކާރު މުވައްޒަފުންނަށް މުސާރަ ދިނުމަށް ކޮންމެ މަހަކު ފޮނުވާ 15 މިލިޔަން އެމެރިކާ ޑޮލަރު އިސްރާއީލު ސަރުކާރާއި ޙަމާސްއާ ދެމެދު ވެފައިވާ އެއްބަސްވުމެއްގެ ދަށުން ކޮންމެ މަހަކު ޣައްޒާއަށް ލިބޭ ގޮތް އިސްރާއީލު ހަދައިދެއެވެ. މިފަހަރުގެ ފައިސާ ވެސް ދެ ހަފުތާއަށް ހިފެހެއްޓުމަށް ފަހު ފަހުން ދޫކޮށްލީއެވެ.
