އިސްލާމްދީނަށް މަލާމާތްކޮށް ފުރައްސާރަކުރާ މީހުން ހޯދައި ކަމާބެހޭ މުއައްސަސާތައް ގުޅިގެން އެކަންކަން ހުއްޓުވަން މަސައްކަތް ކުރައްވާނެ ކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
އެމިނިސްޓްރީން މިހެން ވިދާޅުވީ ފަހަކަށް އައިސް ދިނާ ނުގުޅޭ ސައްޙަނޫން ދޮގުމަޢުލޫމާތު ފަތުރައި ދީނަށް މަލާމާތާއި ފުރައްސާރަ ކުރަމުންދާ ކަމުގެ ޝަކުވާ ލިބެމުންދާ ކަމަށް ވިދާޅުވެ ނެރުއްވި ނޫސްބަޔާނެއްގައެވެ.
"ފޮރުވިގެން ތިބެ، ދީނުގެ ނަމުގައި ހަރުކަށިކަމާއި އަނިޔާވެރިކަމަށް ހިތްވަރުދީ، މީހުންގެ މުދަލާއި ފުރާނައަށް ޝަރުޢީ ހަމަތަކުން ބޭރުން ގެއްލުންދޭނެ ކަމުގެ އިންޒާރުދިނުން ފަދަ އިސްލާމްދީން އެކަންކަމުން ބަރީއަވެގެންވާ ކަންކަން ކުރާ ފަރާތްތަކާއި، އިސްލާމްދީނަށް މަލާމާތްކޮށް ފުރައްސާރަކުރާ ފަރާތްތައް ހޯދައި ކަމާ ބެހޭ މުއައްސަސާތައް ގުޅިގެން އެކަން ހުއްޓުވަން މި މިނިސްޓްރީން މަސައްކަތްކުރާނެ ވާހަކަ ދަންނަވަމެވެ." މިނިސްޓްރީގެ ބަޔާނުގައި ވެއެވެ.
އެ ބަޔާނުގައި ވިދާޅުވެފައިވަނީ އިސްލާމްދީނާމެދު ޝައްކާއި ވަހުމާއި ނަފްރަތު އުފެދޭ ގޮތަށް ވާހަކަ ދައްކައި ޝަރީޢަތާއި ﷲ އާޔަތްތަކަށް މަލާމާތްކޮށް ފުރައްސާރަކުރާ މީހުންނަށް ﷲ ގެ ވަޢީދުގެ ބަސްފުޅު އައިސްފައިވާ ކަމަށެވެ. "އިސްލާމްދީނާ މެދު ޝައްކާއި ވަހުމާއި ނަފްރަތު އުފެދޭ ގޮތަށް ނުވަތަ ދީނުގެ ޙުކުމްތައް އޮޅޭގޮތަށް ނުވަތަ ދީނަށް ފުރައްސާރަ ކުރެވޭފަދަ މޭރުމަކުން ވާހަކަ ދައްކައި ﷲގެ އާޔަތްތަކަށް މަލާމާތްކޮށް ފުރައްސާރަ ކުރާ މީހުންނަށް ﷲގެ ވަޢީދުގެ ބަސްފުޅު އައިސްފައިވެއެވެ."
އިސްލާމްދީނާ ގުޅޭ ގޮތުން ސައްޙަ ނޫން މަޢުލޫމާތު ފެތުރުމުން ޒަމާނުއްސުރެ ދިވެހިންގެ މެދުގައި އޮންނަ އިސްލާމީ އެއްބައިވަންތަކަމަށް ބުރޫ އަރައި އިސްލާމީ ވަޙުދަތު ގެއްލިގެންދާނެ ކަމަށް މިނިސްޓްރީގެ ބަޔާނުގައި ވިދާޅުވެފައިވެއެވެ.
ސޯޝަލް މީޑިއާފަދަ ވަސީލަތްތައް މެދުވެރިކޮށް އެފަދަ ވާހަކަ ފަތުރާ މީހުންނަށް ޖަވާބު ދެއްވުމުގައި އިސްލާމީ ދަޢުވަތުގެ ރީތި އުސޫލު ހިފެހެއްޓެވުމަށް ވެސް މިނިސްޓްރީން ވިދާޅުވެފައިވެއެވެ.
ޝަރުޢީ ކަންކަމުގައި ބަޙުސް ކުރާއިރު އެކަމެއް ދީނުގައި އޮންނަގޮތް ރަނގަޅަށް އެނގުމަކާ ނުލައި އޮޅުންއަރާ ގޮތަށް ބަޙުސް ނުކުރުމަށް ވެސް މިނިސްޓްރީން ވަނީ ނަސޭޙަތްތެރިވެ ވަޑައިގެންފައެވެ.
އިސްލާމް ދީނާ ބެހޭ މަޢުލޫމާތު އޮޅުން ފިލުވަން ބޭނުންވާ ފަރާތްތަކަށް އިސްލާމިކް މިނިސްޓްރީން މަޢުލޫމާތު ދެއްވުމުގެ އިންތިޒާމް ހަމަޖައްސަވާފައިވާނެ ކަމަށް ވެސް ބަޔާނުގައި ވިދާޅުވެފައިވެއެވެ.
ފަހަކަށް އައިސް ބައެއް ފަރާތްތަތަކުން ގެންދަނީ ރަސޫލާއަށް ނިސްބަތްކޮށް އެކަށީގެން ނުވާ ވާހަކަތައް ސޯޝަލް މީޑިއާގައި ފަތުރަމުންނެވެ. އެކަމާ ގުޅިގެން އެފަދަ މީހުންނަށް ފާޑުކިޔުންތައް ވަނީ އަމާޒު ވެފައެވެ.
