ހުޅުމާލޭގައި އުޅުނު ބަންގްލަދޭޝް މީހަކު މަރުވި މައްސަލައެއް ތަޙުޤީޤު ކުރަމުންދާ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ އެމީހާ މަރުވެފައި އޮއްވައި ފެނިފައިވަނީ ހުޅުމާލޭގައި އޭނާ ދިރިއުޅެމުން ދިޔަ ތަނުގައި ކަމަށެވެ. އެމީހާގެ މަރުގެ މަޢުލޫމާތު ލިބިފައިވަނީ މިއަދު 2:00 ގައި ކަމަށް ވެސް ވިދާޅުވެފައިވެއެވެ.
ޢުމަރުން 38 އަހަރުގެ އެމީހާ މަރުވެފައި އޮއްވައި ފެނުމުން ވަނީ ހުޅުމާލެ ހޮސްޕިޓަލަށް ގެނެސްފައެވެ. ހޮސްޕިޓަލަށް ގެނައި އިރުވެސް މަރުވެފައިވާ ކަމަށް ޑޮކްޓަރުންނާ ޙަވާލާ ދެއްވައި ފުލުހުން ވަނީ ވިދާޅުވެފައެވެ. އޭނާގެ ހަށިގަނޑުގެ ބޭރުން އެއްވެސް އަނިޔާއެއް ފެންނަން ނެތްކަމަށް ވެސް ފުލުހުން ވިދާޅުވިއެވެ. ފުލުހުން ގެންދަވަނީ މަރުގެ މިމައްސަލަ ތަޙުޤީޤު ކުރައްވަމުންނެވެ.
