ފިލިޕީންސްގެ ދެކުނުގެ ރަށެއް ކަމުގައިވާ މިންޑަނާއޯގެ ބަންސަމޯރޯ ނުވަތަ މޯރޯ މުސްލިމުންނަށް ދާޚިލީ މިނިވަންކަން ދިނުމަށް އެކުލަވާލާފައިވާ ގާނޫނާމެދު ރައްޔިތުންގެ ފެންނަ ނުފެންނަ ވޯޓެއް މާދަމާ ބާއްވަން ނިންމާފައިވާއިރު، ގިނަ ނަސާރާއިން މުސްލިމުންނަށް ދާޚިލީ މިނިވަންކަމަށް ތާއީދުރަމުން އެބަދެއެވެ.
މުސްލިމުން ބައިބޯ ސަރަހައްދަށް ދާޚިލީ މިނިވަންކަން ދިނުމަށް ތާއީދުކުރާ މީހުންގެ ތެރޭގައި އެ ސަރަހައްދުގައި ދިރިއުޅޭ ނަސާރާއިންވެސް ހިމެނެއެވެ.
"އަހަރުމެން އެ ގާނޫނަށް ތާއިދުކުރާނަން." އެނަޑޯލޯ ނިއުސް އެޖެންސީއާ ވާހަކަދައްކަމުން އެ ސަރަހައްދުގެ ނަސާރާއިންގެ އިސްމީހެއް ކަމުގައިވާ އަލްޑްރިން ޕެނަމޯރާ ބުނެފައި ވެއެވެ. "އެ ގާނޫނުން މި ސަރަހައްދަށް ގިނަ ކަންތައްތަކެއް ވެގެންދާނެ. އަހަރެން ގަބޫލުކުރާ ގޮތުގައި ނަސާރައިންނާއި، މުސްލިމުންނާއި، ލުމާޑްސް ގަބީލާގެ މީހުން ދިރިއުޅޭ މިސަރައްދަށް އެ ގާނޫނުގެ ސަބަބުން އިގްތިސާދީ ތަރައްގީއާއި، އަމާންކަން އަންނާނެ." އޭނާ އިތުރަށް ބުންޏެވެ.
ބަންގްސަމޯރޯ އޯގަނިކް ލޯ (ބީއޯއެލް) ގެ ސަބަބުން މުސްލިމުން ތަހައްމަލްކުރަމުން އައި ނާއިންސާފު ނެތިގެން ދާނެކަމަށް ގިނަ ބަޔަކު ގަބޫލުކުރެއެވެ. އަދި ދިގުމުއްދަތަކަށް މޯރޯ މުސްލިމުންނަށް އަނިޔާވެރިވުގެ ސަބަބުން ގައުމުގައި އުފެދިފައިވާ ޒަޚަމްތައް ފަސޭހަވެގެންދާނެއެވެ.
"ބީއޯއެލްއާމެދު ލާ ވޯޓުގެ ނަތީޖާ އަހަރުމެންގެ ސަރަހައްދަށް ވަރަށް މުހިއްމު." މިންޑަނާއޯ ސަރަހައްދުގެ މުސްލިމުންގެ ޒައީމެއް ކަމުގައިވާ އަންޒަރީހް މަސްތޫރާ މަތާލަމް ވިދާޅުވިއެވެ.
"އަހަރުމެން ދެކެނީ އެ ގާނޫނަކީ މި ސަރަހައްދުގެ މުސްގަތުބަލު ކަމުގައި. އަދި އަހަރުމެންގެ ދަރިންގެ އުއްމީދު ކަމުގައި. އަހަރެން ގަބޫލުކުރާ ގޮތުގައި އޭ ގާނޫނުން މޯރޯ މީހުންނަށް އިތުރު ތަރައްގީއާއި، ތަނަވަސްކަމާއި، އަމާންކަން ގެނެސްދޭނެ."
ބީއޯއެލް ގާނޫނަށް ތާއީދު ހޯދުމަށް މިންޑަނާއޯގެ ކޮޓަބާޓޯ ސިޓީގައި ބޭއްވި އެއްވުމެއްގައި ވާހަކަފުޅު ދައްކަވަމުން ފިލިޕީންސްގެ ރައީސު ރޮޑްރިގޯ ޑުޓެރްޓޭ ވަނީ އެގާނޫނަށް ތާއީދުކުރުމަށް ގޮވައިލައްވާފައެވެ.
ފެންނަ ނުފެންނަ ވޯޓު ދެ ރަށެއްގައި މާދަމާ ބާއްވާއިރު، މި ވޯޓުގެ ދެވަނަ ބުރެއް އެހެން ރަށްރަށުގައި ފެބްރުއަރީ 6 ގައި އޮންނާނެއެވެ.
ބީއޯއެލްއިން މިންޑަނާއޯގެ މުސްލިމުންނަށް ގާނޫނީ އަދި އިގްތިސާދީ މިނިވަންކަން ލިބިގެން ދާނެއެވެ. އަދި އިސްލާމީ ޝަރުއީ ކޯޓުތައް އުފެދިގެން ދާނެއެވެ. މިންޑަނާއޯ ސަރަހައްދުގެ ހިންގުން މަރުކަޒީ ސަރުކާރުން މިންޑަނާއޯގެ ސަރަހައްދީ ސަރުކާރަށް ބަދަލުކުރެވޭނެއެވެ.
މި ގާނޫނު ތަސްދީގުވުމުން، އެ ސަރަހައްދުގެ މިނިވަންކަމަށް ފާއިތު 50 އަހަރު ހަނގުރާމަކުރަމުން ދިޔަ މޯރޯ އިސްލާމިކް ލިބަރޭޝަން ފްރަންޓް (އެމްއައިއެލްއެފް) ގެ 40 ހާސް ހަނގުރާމަވެރިން ހިމެނޭ ބަންގްސަމޯރޯ އިސްލާމިކް އާމްޑް ފޯސަސް (ބީއާއޭފް) އުވާލެވޭނެއެވެ.
