މިއަދު ހެނދުނު 7:05 އެހައިކަންހާއިރު މާލޭ މަސްމާރުކޭޓު ސަރަހައްދުގައި ހިނގި އެކްސިޑެންޓެއްގައި އަނިޔާވި 17 އަހަރުގެ ކުއްޖަކު ނިޔާވެއްޖެއެވެ.
އޭނާ ނިޔާވެފައިވަނީ އެކްސިޑެންޓަށްފަހު އައިޖީއެމް ހޮސްޕިޓަލުގައި ފަރުވާ ދެމުންދަނިކޮށް އެކެއްޖަހަން ކައިރިވެފައި ހުއްޓައި ކަމަށް ފުލުހުން މަޢުލޫމާތު ދެއްވައިފައިވެއެވެ. އެކްސިޑެންޓު ހިނގި ތަނުގައި އެކުއްޖާ އޮތްއިރު ވިންދު ވެސް ނެތްކަމަށް މަޢުލޫމާތު ލިބިފައިވެއެވެ. އެހެންނަމަވެސް ހޮސްޕިޓަލަށް ގެންގޮސް ފަރުވާ ދޭން ފެށުމަށްފަހު ވިންދު ހުރިކަމަށް ޑޮކްޓަރުން ވަނީ މަޢުލޫމާތު ދެއްވައިފައެވެ. އޭނާ ހޮސްޕިޓަލަށް ގެންދިޔައިރުވެސް ޙާލު ސީރިއަސް ކަމަށް ވެއެވެ.
މި އެކްސިޑެންޓް ހިނގީ ޕާކްކޮށްފައި އޮތް ޕިކަޕެއްގައި އެކުއްކާ ދުއްވި ސައިކަލް ޖެހިގެން ކަމަށް ފުލުހުން ވަނީ ވިދާޅުވެފައެވެ. މި އެކްސިޑެންޓުގައި ވަނީ އެކުއްޖާ ދުއްވި އެއާބްލޭޑް ސައިކަލް ހަލާކުވެފައެވެ.
އެކްސިޑެންޓުގައި މި ފިރިހެން ކުއްޖާގެ ބޮލަށާއި ގައިގެ އެތަންމިތަނަށް ވަނީ ޒަޚަމްވެފައި ކަމަށް މަޢުލޫމާތު ލިބިފައިވެއެވެ.
