ސަރުކާރު ކޯލިޝަން ރޫޅިގެން ދިޔަނުދީ އެ ކޯލިޝަން ވަރުގަދަ ކުރުމަކީ ކޯލިޝަނުގެ ހުރިހާ ބައިވެރިންގެވެސް ގައުމީ ވާޖިބެއް ކަމަށް ކުރީގެ ރައީސް މައުމޫން އަބްދުލްގަތްޔޫމް މިއަދު ވިދާޅުވެއްޖެއެވެ.
ދާދި ދެންމެއަކު އެމަނިކުފާނު ކުރެއްވި ޓްވީޓެއްގައި ވިދާޅުވީ ކޯލިޝަން ރޫޅިގެން ދިޔަނުދީ ހިފެހެއްޓުމުގެ ޒިންމާ އެންމެ ބޮޑަށް އޮތީ ކޯލިޝަނުގެ ހަތަރު ލީޑަރުންގެ ކައިބައިގައި ކަމަށެވެ.
"މިކަމުގައި އިއްޒަތްތެރި ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙް އާއި ހަތަރު ލީޑަރުންގެ މަސްއޫލިއްޔަތު ވަރަށް ބޮޑު" މައުމޫން ވިދާޅުވިއެވެ.
ރައީސް މައުމޫން މިފަދައިން ޓްވީޓް ކުރެއްވިއިރު ކޯލިޝަން ރޫޅިގެން ހިނގައިދާނެ ކަމުގެ ކުލަތަކެއް ވަނީ ފެންނަން ފަށާފައެވެ. މަޖިލީހުގެ އިންތިޚާބުގެ ފޯރީގައި އެމްޑީޕީ އާއި ޖުމްހޫރީ ޕާޓީގެ މެދުގައި އުފެދިގެން އުޅޭ ޚިޔާލު ތަފާތުވުން ގަނޑުގެ ތެރެއިން މަޖިލީހަށް ނުކުންނައިރު ޖޭޕީއާ ކޯލިޝަން ހަދާނެ ޕާޓީތަކެއް އޮތް ނަމަ އެބަޔަކާއެކު ނުކުންނަން ވިސްނަވާ ކަމަށް ޖޭޕީގެ ލީޑަރު ވަނީ ވިދާޅުވެފައެވެ. އަދި އެމްޑީޕީގެ ރައީސް މުޙަންމަދު ނަޝީދަށް މަޖިލީހަށް ކުރިމަތިނުލެވޭ ގޮތަށް ގާނޫނަށް އިސްލާޙު ގެނަން ދިއްދޫ ދާއިރާގެ މެމްބަރު ލަތީފް ވެއްދި އިސްލާޙުވެސް ވަނީ ހޫނުވެފައެވެ.
