ސްރީލަންކާގެ ވެރިރަށް ކޮލޮމްބޯގައި ޗައިނާއިން ހަދާ ކޮލޮމްބޯ ޕޯޓް ސިޓީއަށް ބޭނުންވާ ބިން ޗައިނާ ސަރުކާރުގެ ކުންފުންޏަކުން ހިއްކައި ނިމުން އިއްޔެ ފާހަގަކޮށްފިއެވެ. ޗައިނާ ކޮމިއުނިކޭޝަންސް ކޮންސްޓްރަކްޝަންސް ކޮމްޕެނީ ލިމިޓެޑް (ސީސީސީސީ) އިން ހަދަ ކޮލޮމްބޯ ޕޯޓް ސިޓީގެ މަޝްރޫއަކީ ޗައިނާގެ ވަން ބެލްޓް ވަން ރޯޑް އިނިޝިއެޓިވްގެ ދަށުން ސްރީލަންކާގައި ހިންގާ އެންމެ އަގު ބޮޑު މަޝްރޫއެވެ.
"ކޮލޮމްބޯ ޕޯޓް ސިޓީއަކީ، މެރިޓައިމް ސިލްކް ރޯޑުގައި ހިމެނޭ ސްރީލަންކާގައި ޗައިނާގެ ވަން ބެލްޓް ވަން ރޯޑް އިނިޝިއެޓިވްގެ ދަށުން ހިންގާ މުހިއްމު މަޝްރޫއެއް". ބިން ހިއްކައި ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސްރީލަންކާގައި ހުންނަވާ ޗައިނާގެ ސަފީރު ޗެންގ ޒުއޭޔުއާން ވިދާޅުވިއެވެ.
"ބައިނަލްއަގްވާމީ ހާލަތު ކޮންމެ ގޮތަކަށް ބަދަލުވިޔަސް، ސްރީލަންކާ-ޗައިނާ ގުޅުމަށް ޗައިނާއިން އަބަދުވެސް މުހިއްމުކަންދޭނެ. އަދި ދެގައުމުގެ ވެރިން އެއްބަސްވާ ކަންތައް ތަންފީޒުކުރާނެ." އޭނާ އިތުރަށް ވިދާޅުވިއެވެ.
ކުރީގެ ރައީސު މަހިންދަ ރާޖަޕަކްސަގެ ސަރުކާރާ ޗައިނާ ސަރުކާރާ ދެމެދު ވެވުނ އެއްބަސްވުމެއްގެ ދަށުން ހިންގާ 1.4 ބިލިއަން އެމެރިކާ ޑޮލަރުގެ މި މަޝްރޫއަކީ ސްރީލަންކާގައި ޗައިނާއިން ހިންގާ އެތައް ބިލިއަން ޑޮލަރުގެ މަޝްރޫއުތަކުގެ ތެރެއިން އެއް މަޝްރޫއުތަކެވެ. މި މަޝްރޫއުތަކުގެ ސަބަބުން ސްރީލަންކާގެ މައްޗަށް ޗައިނާގެ ނުފޫޒު ގަދަވެގެން ދާތީ އިންޑިޔާއާއި ބައެއް އެހެން ގައުމުތަކުން ވަނީ ކަންބޮޑުވުން ފާޅުކޮށްފައެވެ.
ސްރީލަންކާގެ ދެކުނުގެ ރަށެއް ކަމުގައިވާ ހަންބަންޓޯޓާގައި ޗައިނާއިން ހެދި 1.4 ބިލިއަން ޑޮލަރުގެ ބަނދަރު ހަދަން ނެގި ލޯނު ނުދެއްކުމުގެ ސަބަބުން 2017 ވަނަ އަހަރު އެ ބަނދަރު ވަނީ 99 އަހަރަށް ޗައިނާއަށް ކުއްޔަށް ދީފައެވެ.
ކޮލޮމްބޯގައި އަލަށް ހިއްކައި ނިންމި 296 ހެކްޓަރުގެ ބިން ފައިނޭޝަލް ޑިސްޓްރިކްޓެއްގެ ގޮތުގައި ތަރައްގީކުރަން ނިންމާފައިވާ އިރު އެ ސަރަހައްދުގެ ތިންބައިކުޅަ ދެބައި 99 އަހަރަށް ޗައިނާއަށް ދޭން ޖެހެއެވެ.
މި މަޝްރޫއާ މެދު ވާހަކަފުޅު ދައްކަވަމުން، މަޝްރޫއާ ހަވާލުވެ ހުންނެވި ވަޒީރު ޕަޓާލީ ޗަންޕިކާ ވިދާޅުވީ، މިއީ ސްރީލަންކާގެ ސިޔާދަތަށް އުނިކަން ދޭނެ، އަދި އިންޑިޔާގެ ސަލާމަތަށް ނުރައްކަލަކަށް ވާނެ މަޝްރޫއެއް ނޫން ކަމުގައެވެ.
ކޮލޮމްބޯ ޕޯޓް ސިޓީގައި ލަގްޒަރީ އެޕާޓްމަންޓާއި، ހޮޓަލާއި، ޝޮޕިންގ މޯލާއި، އޮފީސް އިމާރާތްތަކުގެ އިތުރަށް، އިންޓަނޭޝަނަލް ސްކޫލަކާއި، ތީމް ޕާކަކާއި، ސެންޓްރަލް ޕާކަކާއި، ޔޮޓް މެރީނާއަކީ، ދޮންވެލި ބީޗެއްވެސް ހަދަން ނިންމާފައި ވެއެވެ.
