ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ޓިކެޓުގައި ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕާޓީގެ އެތެރޭގެ ޕްރައިމަރީގައި ވޯޓުލުމަށް 86،000 އެމްޑީޕީ މެމްބަރުން ރަޖިސްޓްރީ ކޮށްފައިވާ ކަމަށް އެޕާޓީން ބުނެފިއެވެ.
އެމްޑީޕީގެ ނައިބު ރައީސް މުޙަންމަދު ޝިފާޒް ވިދާޅުވީ އަންނަ ހުކުރު ދުވަހު މެންދުރު ފަހު 2:30 ން ރޭގަނޑު 8:30 އަށް ބާއްވާ ޕްރައިމަރީގައި ވޯޓުލުމަށް ރަޖިސްޓްރީ ކުރަން ހުޅުވާލުމުން ރަޖިސްޓްރީ ކޮށްފައިވާ 86،000 މީހުންނަކީ 87 ދާއިރާއަށް ރަޖިސްޓްރީ ކޮށްފައިވާ މީހުން ކަމަށެވެ. މީގެތެރެއިން މާލޭގެ ދާއިރާ ތަކަށް ވޯޓުލާން ރަޖިސްޓްރީ ކޮށްފައި ވަނީ 32،000 މީހުން ކަމަށްވެސް ޝިފާޒް ވިދާޅުވިއެވެ.
ޝިފާޒް ވިދާޅުވީ ޕްރައިމަރީގައި ބަހައްޓާނީ ޖުމްލަ 270 ވޯޓު ފޮށި ކަމަށެވެ. އޭގެތެރެއިން ރާއްޖެއިން ބޭރުގައި ބަހައްޓާނީ 3 ފޮށި ކަމަށާއި އެ 3 ފޮށި ބަހައްޓާނީ އަވައްޓެރި ސްރީލަންކާ އާއި އިންޑިޔާގެ އިތުރުން މެލޭޝިޔާގައި ކަމަށްވެސް އޭނާ ވިދާޅުވިއެވެ.
އެމްޑީޕީން ހުކުރު ދުވަހު ނަގާ ވޯޓުގައި މަޖިލީހުގެ ޕްރައިމަރީގައި 10 ދާއިރާއެއް ފިޔަވައި އެހެން ހުރިހާ ދާއިރާއެއްގައިވެސް ވޯޓަށް ދާނެއެވެ. އަނެއް 10 ދާއިރާގެ ތެރެއިން 9 ދާއިރާގެ ޓިކެޓު އޮޓަމެޓިކުން 9 ކެންޑިޑޭޓުންނަށް ލިބިފައިވާއިރު މަޖިލީހުގެ ނިލަންދޫ ދާއިރާއަށް އެޕާޓީން އެއްވެސް މީހަކު ޕްރައިމަރީގައި ވާދަކުރަން ނިންމާފައި ނުވެއެވެ.
