އިނގިރޭސިވިލާތް ޔޫރަޕިއަން ޔުނިއަން (އީޔޫ) އިން ވަކިވުމުގެ އުސޫލުތައް ކަނޑައަޅާ ބިލް އަންނަ އަންގާރަ ދުވަހު އިނގިރޭސީ ގާނުނުހަދާ މަޖިލީހުގެ ތިރިގެ، ހައުސް އޮފް ކޮމަންސްއިން ފާސްނުވެއްޖެނަމަ، ބޮޑުވަޒީރު ޓެރޭސާ މޭގެ އިތުބާރު ނެތްކަމުގެ ވޯޓެއް ނަގަން އިދިކޮޅު ލޭބަ ޕާޓީން ތައްޔާރުވެއްޖެއެވެ.
އަންނަ އަންގާރަ ދުވަހާއި ބުދަ ދުވަހު ކޮންމެހެންވެސް ހައުސް އޮފް ކޮމަންސްގެ ޖަލްސާއަށް ހާޒިރުވެވަޑައިގަތުމަށް ލޭބަ ޕާޓީގެ މެންބަރުންނަށް އަންގަމުންދާކަމަށް ދި އޮބްޒާވާ ނޫހުގައި ވެއެވެ. އެއީ އަންގާރަ ދުވަހު އޮންނަ އީޔޫއިން ވަކިވުމާ ބެހޭ ބިލާ ދެކޮޅަށް ވޯޓުދެއްވުމަށާއި، ޓެރޭސާގެ މޭގެ އިތުބާރު ނެތްކަމަށް ބުދަ ދުވަހު ނަގާ ވޯޓުގައި ބައިވެރިވެވަޑައިގަތުމަށެވެ.
އީޔޫއިން ވަކިވުމާ ބެހޭ ބިލަކީ ފާއިތުވި ޑިސެންބަރު މަހު ފާސްކުރަން ޖެހޭ ބިލެކެވެ. ނަމަވެސް ގިނަ މެންބަރުންތަކެއް އެ ބިލާ ދެކޮޅުހައްދަވަމުން ގެންދަވާތީ އެބިލަށް ވޯޓަށް އެހުން ލަސްކުރީއެވެ. އެހެންނަމަވެސް، އަންގާރަ ދުވަހު ނަގާ ވޯޓުގައި ވެސް ބޮޑުވަޒީރަށް ނާކާމިޔާބީއާ ކުރިމަތިލައްވަން ޖެހިވަޑައިގަތުން ވަރަށް ގާތެވެ.
ލޭބަ ޕާޓީގެ ލީޑަރު ޖެރެމީ ކޯބިން ގެންދަވަނީ މިދަނޑިވަޅުގެ ބޭނުން ހިއްޕަވައިގެން ބޮޑުވަޒީރުގެ އިތުބާރު ނެތް ކަމުގެ ވޯޓެއް ކާމިޔާބުކުރައްވާށެވެ. އެފަދަ ވޯޓެއް ފާސްވެއްޖެނަމަ، އިނގިރޭސި ގާނޫނު ބުނާގޮތުން، ވެރިކަންކުރާ ކޮންޒަވެޓިވް ޕާޓީއަށް އާ ސަރުކާރެއް އެކުލަވާލުމަށް ދެ ހަފުތާ ލިބޭނެއެވެ. ދެ ހަފުތާ ތެރޭ ވެރިކަންކުރާ ޕާޓީއަށް އާ ސަރުކާރެއް އެކުލަވާނުލެވިއްޖެނަމަ، އާއްމު އިންތިޚާބެއް ބާއްވަން ޖެހޭނެއެވެ.
އިތުބާރު ނެތް ކަމުގެ ވޯޓު ކާމިޔާބު ނުވެއްޖެނަމަ. އީޔޫއިން ވަކިވުމާމެދު އާއްމުންގެ ޚިޔާލު ހޯދުމުގެ ދެވަނަ ވޯޓަކަށް ތާއީދުކުރައްވަން ކޯބިންއަށް ޖެހިވަޑައިގަންނަވާނެކަމަށް ބެލެވެއެވެ. ލޭބަ ޕާޓީގެ ކުރީގެ ނާއިބު ލީޑަރު ރޯއި ހެޓަސްލީ ވަނީ ޚިޔާލު ހޯދުމުގެ ދެވަނަ ވޯޓަކަށް ތާއީދު ހޯއްދެވުމުގެ މަސައްކަތް ފައްޓަވާފައެވެ.
އީޔޫއާއި އިނގިރޭސިވިލާތާ ދެމެދު އެއްބަސްވެފައިވާ ގޮތުން އަންނަ މާރިޗު މަހުގެ 29 ވަނަ ދުވަހު އިނގިރޭސިވިލާތް އީޔޫއިން ވަކިވާނެއެވެ. އެހެންނަމަވެސް، އެކަމުގެ އުސޫލުތައް ކަނޑައަޅާ ގާނޫނު އަދިވެސް މިވަނީ ފާސްނުވެއެވެ.
