މޫދަށް އެރިއުޅުނު ދެ ޓޫރިސްޓަކު މަރުވެއްޖެއެވެ .
އެދެމީހުން މަރުވީ މާލެއަތޮޅު ދިއްފުއްޓާއި މީރުފެންފުއްޓާ، ދެމެދަށް މޫދަށްއެރިއުޅުމުގެ ތެރޭގައި ކަމަށް ފުލުހުން ވިދާޅުވިއެވެ. އެދެމީހުންނަކީ ދިއްފުށީގައި ޗުއްޓީ ހޭދަކުރަމުން ދިޔަ ދެމީހުންނެވެ.
އެ މީހުންގެ މަރުގެ މަޢުލޫމާތު ލިބިފައިވަނީ މިއަދު ހެނދުނު 10:56 އެހައިކަންހާއިރު ކަމަށްވެސް ފުލުހުން ވިދާޅުވިއެވެ.
މަރުވެފައިވަނީ ފިލިޕީންސްގެ ދެމީހުންނެވެ. އެއީ 29 އަހަރުގެ ފިރިހެނަކާއި، 30 އަހަރުގެ އަންހެނެއް ކަމަށް ވެސް ފުލުހުން ވިދާޅުވިއެވެ. ދިއްފުށީ ސިއްޙީމަރުކަޒަށް ގެންދިޔައިރުވެސް ދެ މީހުން ވަނީ މަރުވެފައި ކަމަށް ފުލުހުން ވިދާޅުވިއެވެ. މަރުވެފައިވަނީ ދެމަފިރިން ކަމަށްވެސް މައުލޫމާތު ލިބިފައިވެއެވެ.
މިޙާދިސާ ހިނގަން މެދުވެރިވި ސަބަބެއް އަދި ސާފެއް ނުވެއެވެ. އެއީ ފަތަން ދަންނަ ބައެއް ކަމެއް ވެސް ކަށަވަރުކުރެވިފައެއް ނުވެއެވެ. ފުލުހުންދަނީ މައްސަލަ ތަޙުޤީޤު ކުރަމުންނެވެ.
