ވިލިގިލި (ވިލިމާލެ) ސަހަރާގައި އަލުން މީހުން ވަޅުލާގޮތަށް މާލޭ ސިޓީކައުންސިލުން ހަމަޖައްސަވައިފިއެވެ.
އެގޮތަށް ހަމަޖެއްސެވީ ދެ އަހަރާއި ބައި ވަންދެން އެތަން ސާފުނުކޮށް އޮތުމަށްފަހު ސާފު ކުރުމަށްފަހުގައެވެ. ސަހަރާ ސާފުކޮށްފައިވަނީ މާލޭ ސިޓީ ކައުންސިލްގެ އެއްބާރުލެއްވުމާއެކު ވިލީގިލީގައި އުޅޭ ހެޔޮއެދޭ ފަރާތްތަކުން ކަމަށް މާލޭސިޓީ ކައުންސިލުން ވިދާޅުވެފައިވެއެވެ.
ދެ އަހަރާއި ބައިވަންދެން ވިލިގިލީ ސަހަރާ ސާފުނުކޮށްއޮތީ ކީއްވެ ކަމެއް ސިޓީކައުންސިލުން ވިދާޅުވެފައިވެއެވެ. ރައީސް ޔާމީންގެ ސަރުކާރުންވަނީ ސިޓީ ކައުންސިލުން ގިނަބާރުތަކެއް ވަކިކުރައްވައިފައެވެ. އޭގެތެރޭގައި މިސްކިތްތަކާއި ސަހަރާތައް ބެލެހެއްޓުން ވެސް ހިމެނެއެވެ.
އިސްލާމިކް މިނިސްޓްރީން މިހާރުވަނީ މާލޭސިޓީގެ މިސްކިތްތަކާއި، ސަހަރާތަކާއި މޯޗަރީތައް ބެލެހެއްޓުން ރަސްމީގޮތުން މާލެ ސިޓީ ކައުންސިލާ ޙަވާލު ކުރައްވައިފައެވެ.
އެ ސަހަރާގައި މީހުން ވަޅުލަން ފަށާނީ ހިނަވާގެ ސާފުކޮށް މަރާމާތު ކުރުމަށްފަހު ކަމަށް މާލޭ ސިޓީ ކައުންސިލުން ވިދާޅުވެފައިވެއެވެ.
