އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު އަކިލޭޝް މިޝްރާއާ، މޯލްޑިވްސް ތާޑުވޭ ޑިމޮކްރެޓްސް (އެމްޓީޑީ) އިން މިއަދު ބައްދަލުކުރައްވައިފިއެވެ.
އެމްޓީޑީގެ ފަރާތުން ސަފީރާ ބައްދަލު ކުރެއްވި ޓީމުގައި އިސްކޮށް ހުންނެވީ އެޕާޓީގެ ނާއިބު ރައީސް، ވެލިދޫ ދާއިރާގެ މަޖިލިސް މެމްބަރު ޔާމީން ރަޝީދެވެ.
މިބައްދަލުވުމުގައި އެޕާޓީންވަނީ ޕާޓީގެ ރައީސް އަޙުމަދު އަދީބުގެ ޞިއްޙީ ޙާލަތާ ބެހޭ ފަހުގެ މަޢުލޫމާތު ސަފީރާ ޙިއްސާ ކުރައްވައިފައެވެ.
ބޭސްފަރުވާއަށް ގޭ ބަންދުގައި ހުންނަވަނިކޮށް ކަރެކްޝަނުންވަނީ އަދީބު ޖަލަށް ބަދަލު ކުރައްވައިފައެވެ. ޖަލަށް ބަދަލު ކުރެއްވުމުން އޭނާގެ ޙާލު ގޯސްވެ މިހާރުވަނީ އައިޖީއެމް ހޮސްޕިޓަލުގައި އެޑްމިޓްކޮށްގެން ފަރުވާދޭން ފަށައިފައެވެ. އެމްޓީޑީން ވިދާޅުވެފައިވަނީ އަދީބުގެ ޙާލަތު ސީރިއަސް ކަމަށެވެ.
އެޕާޓީގެ ނާއިބު ރައީސް ޔާމީން ރަޝީދު ނޫސްވެރިންނަށް މަޢުލޫމާތު ދެއްވަމުން ވިދާޅުވެފައިވަނީ ފެބްރުއަރީ އެކެއްގައި ސުޕްރީމްކޯޓުން ނެރެފައިވާ ޙުކުމުގެ ދަށުން މިނިވަން ކުރަންޖެހޭ ސިޔާސީ ބޭފުޅުންގެ ތެރޭގައި އަދީބުގެ ނަން ވެސް ހިމަނާފައިވާ ކަމަށެވެ. އެ ލިސްޓުގައި ހިމެނޭ ބޭފުޅުންގެ ތެރެއިން އަދީބު ނޫނީ އެންމެން މިނިވަންވެފައިވާ ކަމަށާއި އަދީބު މިނިވަން ނުކޮށް ޖަލުގައި ބަހައްޓަނީ ކީއްވެތޯ އޭނާ ވަނީ ސުވާލު އުފައްދަވައިފައެވެ.
