ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މޯލްޑިވްސް ކޮލިފިކޭޝަންސް އޮތޯރިޓީ އާއި މޯލްޑިވްސް ޕޮލިޓެކްނިކްގެ ސީއީއޯގެ މަޤާމަށް ބޭފުޅުން ހަމަޖައްސަވައިފިއެވެ.
މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ އަކަށް ހަމަޖެއްސެވީ ޑޮކްޓަރ ޢަބްދުލްޙައްނާނެވެ. އޭނާ މި މަޤާމަށް ޢައްޔަން ކުރައްވާފައިވަނީ ސްޓޭޓް މިނިސްޓަރ ފެންވަރުގައެވެ.
ޢަބްދުލްޙައްނާނަކީ އޮސްޓްރޭލިއާގެ ކުއީންސްލޭންޑް ޔުނިވަރސިޓީ އޮފް ޓެކްނޮލޮޖީން ޕީ.އެޗް.ޑީ ހާސިލްކުރައްވާފައިވާފައިވާ ބޭފުޅެކެވެ. އޭނާ އެންމެ ފަހުން އަދާކުރައްވާފައިވަނީ މޯލްޑިވްސް ބިޒްނަސް ސްޓެންޑަރޑްގެ އެޑިޓަރެއްގެ މަޤާމް ކަމަށް ރައީސް އޮފީހުން ވިދާޅުވެފައިވެއެވެ.
މޯލްޑިވްސް ޕޮލިޓެކްނިކްގެ ޗީފް އެގްޒެކެޓިވް އޮފިސަރގެ މަޤާމަށް ޢައްޔަން ކުރެއްވީ ގދ. ގައްދޫ ފަހާގެ، އަޙްމަދު ނާޞިރެވެ. އޭނާ މި މަޤާމަށް ޢައްޔަން ކުރައްވާފައިވަނީ މިނިސްޓަރުންގެ ނާއިބު ފެންވަރުގައެވެ.
އަޙްމަދު ނާޞިރަކީ ތަޢުލީމާއި ތަމްރީނުގެ ދާއިރާއިން ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ. މިގޮތުން އަޙްމަދު ނާޞިރު ވަނީ ވިލާ ކޮލެޖުގެ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް މެނޭޖްމަންޓް އުފެއްދުމާއި މޯލްޑިވްސް މީޑިއާ އިންސްޓިޓިއުޓް އުފެއްދުމުގައި އިސް ދައުރެއް އަދާކުރައްވާފައެވެ.
މީގެ އިތުރުން ވެސް އަޙްމަދު ނާޞިރު ވަނީ ޓިވެޓް އޮތޯރިޓީގެ އެސެސަރގެ މާޤާމާއި ޓިވެޓް އޮތޯރިޓީގެ ކައުންސިލް މެންބަރުކަމާއި ސިވިލް ސަރވިސް ޓްރެއިނިންގް އިންސްޓިޓިއުޓާއި ވިލާ ކޮލެޖާއި ޓްރެއިނިންގް މޯލްޑިވްސާއި، މޯލްޑިވްސް އިންސްޓްޓިއުޓް ފޮރ ޓެކްނޮލޮޖީއާއި، މަންދު ކޮލެޖްގައި ޕާޓް ޓައިމް ލެކްޗަރާއެއްގެ މަޤާމު ވެސް އަދާކުރައްވާފައެވެ. އަޙްމަދު ނާޞިރަކީ މީގެކުރިން މޯލްޑިވްސް މީޑިއާ އިންސްޓިޓިއުޓްގެ އިސްވެރިޔާގެ މަޤާމު އަދާކުރެއްވާފައިވާ ބޭފުޅެކެވެ.
އޭނާ ވަނީ އޯޕަން ޔުނިވަރސިޓީ އޮފް މެލޭޝިޔާއިން "މާސްޓަރސް އޮފް ބިޒްނަސް އެޑްމިނިސްޓްރޭޝަން" ޙާސިލު ކުރައްވާފައެވެ.
