ފައިވްލައިން ފިޝަރީޒް ޕްރައިވެޓް ލިމިޓެޑުން އދ. މަހިބަދޫގައި ޤާއިމްކުރި އައިސް ޕްލާންޓުގެ މަސައްކަތް ނިމި ޚިދުމަތްދޭން ފަށައިފިއެވެ.
އެ ޕްލާންޓުގެ މަސައްކަތް ނިމި އައިސް ދޫކުރަން ފަށައިފައިވަނީ ހުސްވި ހަފްތާގައެވެ. ފައިވްލައިން ފިޝަރީޒްގެ ޕްރައިވެޓް ލިމިޓެޑުގެ ޑިރެކްޓަރ މުޙައްމަދު މުއްޠަލިބު ވިދާޅުވީ މަހިބަދޫ އައިސް ޕްލާންޓުން އައިސް ޓަނެއް ވިއްކާނީ 1285 ރުފިޔާއަށް ކަމަށެވެ.
ކަނޑުމަހުގެ މަސްވެރިކަން ކުރާ ފަރާތްތަކޭ އެއް އުސޫލުން ފަރުމަހުގެ މަސްވެރިކަންކުރާ ފަރާތްތަކަށް ވެސް އެއް އަގެއްގައި އައިސް ވިއްކާނެ ކަމަށް މުއްޠަލިބު ވިދާޅުވިއެވެ.
އޭނާ ވިދާޅުވީ އޯޑަރު ލިބޭގޮތަށް ބަލާފައި އެތަނުގެ ޚިދުމަތް 24 ގަޑިއިރަށް ބަދަލު ކުރަންވެސް ވަނީ ނިންމަވައިފައި ކަމަށެވެ.
ފައިވްލައިން ފިޝަރީޒުން 4.5 މިލިއަން ރުފިޔާ ޚަރަދުކޮށްގެން ހަދައިފައިވާ އައިސްޕްލާންޓަށް ކުރިއަށްއޮތް މަހެއް، ދެމަހެއްހާ ދުވަސްތެރޭގައި މަސްވެރިން ބާނާ ފަރުމަސް ގަންނާނެ ކަމަށް ވެސް އެތަނުން މަޢުލޫމާތު ދެއްވިއެވެ.
"ކުރިއަށްއޮތް މަހެއް ނުވަތަ ދެމަހެއްހާ ދުވަސްތެރޭގައި މި ޕްލާންޓަށް ފަރުމަސް ގަންނަން ފަށާނެ. އައިސް ޕްލާންޓް ޤާއިމްކޮށްފައިވަނީ ދިހަ ޓަނުގެ މަސް ސްޓޯރ ކުރެވޭނެ ސްޓޯރޭޖަކާ ވެސް އެކުގައި،" މުއްޠަލިބު ވިދާޅުވިއެވެ.
އޭނާ ވިދާޅުވީ މަސްވެރިންނަށް ބޭނުންވާ ތެލާއި ފެން ވެސް ކައިރި މުސްތަޤުބަލެއްގައި އެ އައިސްޕްލާންޓުން ލިބޭނެ އިންތިޒާމް ހަމަޖެއްސުމަށް މަސައްކަތް ކުރައްވަމުން ގެންދަވާ ކަމަށެވެ.
DEN MASVERINA VARA BODA FASEEHA VAANE