ގަދަވިއްސަރައާއެކު ބޯކޮށް ހުވަދުއަތޮޅަށް ވާރޭވެހޭނެ ކަމަށް ލަފާކޮށް މެޓު އޮފީހުން މިރޭ ވައިޓް އެލާޓް ނެރެފިއެވެ. އެހެންނަމަވެސް ވައިގަދަވާނެ ކަމަށް މެޓުން ވިދާޅުވެފައެއް ނުވެއެވެ.
އެ އަތޮޅަށް ވައިޓް އެލާޓް ނެރެފައިވަނީ މިރޭ 12:35 އިން ފެށިގެން ހެނދުނު 6:35 އާ ހަމައަށެވެ.
ރާއްޖޭގެ މޫސުމަށް ޢާއްމު ގޮތެއްގައި ބަލާއިރު ދެކުނާއި މެދުތެރޭގެ އެކިހިސާބަށް ވިއްސާރަކުރާނެ ކަމަށް ވެސް މެޓުން ވިދާޅުވެފައިވެއެވެ. މީގެތެރެއިން ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވެއެވެ. އަދި އުތުރު އަތޮޅުތަކަށް ކެރީގެއަސަރުފޯރުމަކީ އެކަށީގެންވާކަމެއް ކަމަށް ވެސް ވިދާޅުވެފައިވެއެވެ.
ވައިޖެހޭނީ އިރުއުތުރާއި އިރުން، އުތުރާއި މެދުތެރޭ އަތޮޅުތަކަށް ގަޑިއަކު15 މޭލާއި 23 މޭލާއި ދެމެދުގެ ބާރުމިނުގައެވެ. ދެކުނުއަތޮޅުތަކަށް ގަޑިއަކު 7 މޭލާއި 17 މޭލާއި ދެމެދުގެ ބާރުމިނުގައި ވައިޖެހޭނެއެވެ. އަދި ވިލާގަނޑުގައި ގަޑިއަކު 40 މޭލު ބާރުމިނަށް ވައިގަދަވުން އެކަށީގެންވާ ކަމަށް މެޓުން ލަފާކުރައްވައިފައިވެއެވެ.
ރާއްޖޭގެ ކަނޑުތައް އުތުރާއާއި މެދުތެރޭ އަތޮޅުތަކުގެ ކަނޑުތައް ގަދަވާނެ ކަމަށާއި، ދެކުނު އަތޮޅުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށްވެސް ވިދާޅުވެފައިވެއެވެ.
