އިސްލާމިކް އެފެއާޒް މިނިސްޓަރުގެ ނާއިބު މަޤާމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިއަދު ބޭފުޅަކު ޢައްޔަން ކުރައްވައިފިއެވެ. އެ މަޤާމަށް ޢައްޔަން ކުރައްވައިފައިވަނީ ފުވައްމުލަކު ސިޓީ މާދަޑު، ނަޒާ، ޝާފިޢު ޢަލީ އެވެ.
ޝާފިޢު ޢަލީ އަކީ މީގެ ކުރިން ތަޢުލީމީ ދާއިރާގައި ޚިދުމަތްކުރައްވާފައިވާ ބޭފުޅެކެވެ. މިގޮތުން ޏ. އަތޮޅު ތައުލީމީ މަރުކަޒުގެ ސެކަންޑަރީ އަދި ހަޔަރ ސެކަންޑަރީ ޓީޗަރެއްގެ ގޮތުގައި ޝާފިޢު ޢަލީ މަސައްކަތް ކުރައްވާފައިވެއެވެ. އަދި އެ މަރުކަޒުގެ ލީޑިންގ ޓީޗަރެއްގެ ގޮތުގައިވެސް ޝާފިޢު ޢަލީ ވަނީ މަސައްކަތް ކުރައްވައިފައެވެ. މީގެ އިތުރުން ފުވައްމުލަކު ސިޓީ، އައިޑިއަލް ސްކޫލްގެ ޕްރިންސިޕަލް ކަންވެސް ޝާފިޢު ޢަލީ ކުރައްވާފައިވެއެވެ.
ޝާފިޢު ޢަލީ ވަނީ މޯލްޑިވްސް ނޭޝަނަލް ޔުނިވަރސިޓީއިން "ބެޗެލަރ އޮފް ޓީޗިންގ، ސެކަންޑަރީ" ޙާސިލު ކުރައްވައިފައެވެ.
