ރާއްޖޭގެ ކުރީގެ މިނިސްޓަރު އަދި ނާއިބު ރައީސް ޑރ. މުޙައްމަދު ޖަމީލު އަޙްމަދު ކުރިއަށް އޮތް ރައްޔިތުންގެ މަޖިލީހަށް ވާދަ ކުރެއްވުމަށް ނިންމަވައިފިއެވެ.
އާފަތިހަށް މަޢުލޫމާތު ދެއްވަމުން އެމަނިކުފާނު ވިދާޅުވީ އެމަނިކުފާނު ކުރިމަތި ލައްވާނީ ވިލިމާލެ ދާއިރާއަށް ކަމަށެވެ. އެމަނިކުފާނު އެދާއިރާއަށް ކުރިމަތި ލައްވަނީ އަމިއްލަ ގޮތުންނެވެ.
އެމަނިކުފާނަކީ ކޯލިޝަންގެ ވަރުގަދަ ބާރެއް ކަމަށްވާ ޖުމްހޫރީޕާޓީގެ ލީޑަރު ޤާސިމް އިބްރާހީމްގެ އެޑުވައިޒަރެވެ. އެމަނިކުފާނު ވިދާޅުވީ ތަރައްޤީއިން ޙައްޤުވާ މިންވަރު ވިލިމާލެ ރައްޔިތުންނަށް ނުލިބި މާލަސްވެއްޖެ ކަމަށެވެ. އެމަނިކުފާނު ވިދާޅުވީ މި ސަރުކާރުގެ ވަޢުދުތައް ފުއްދެވުމަށް މަޖިލީސްތެރެއިން މަސައްކަތް ޕުޅު ކުރައްވާނެ ކަމަށެވެ. އެކަން ކުރެއްވުމަށް ކޯލިޝަންގެ މެމްބަރުން މަޖިލީހަށް އިންތިޚާބުވުން މުހިންމު ކަމަށް ވެސް އެމަނިކުފާނު ވިދާޅުވިއެވެ.
