އިޖުތިމާޢީދާއިރާއިން ރާއްޖެއަށް ދިގުމުއްދަތަކަށް ޚިދުމަތް ކުރެއްވި ޝަމީމާ ކަނބުލޭގެފާނު ނުވަތަ ސަރަނގު ޝަމީމާ މިއަދު ހެނދުނު އަވަހާރަ ވެއްޖެއެވެ.
މަޢުލޫމާތު ލިބިފައިވާ ގޮތުގައި ޝަމީމާ އަވަހާރަވީ މިއަދު ހެނދުނުގެ ވަގުތެއްގައެވެ. އަވަހާރަވިއިރު އުމުރަކީ 72 އަހަރެވެ. އޭނާގެ ތިން ފިރިހެން ކުދިންނާއި ހަ އަން ކުދިން ދުނިޔޭގައި އެބަތިއްބެވިއެވެ. ޝަމީމާއަކީ ޝަރަފުވެރިކަމުގެ ޤައުމީ އިނާމް ވެސް މިއަހަރު ޙާސިލް ކުރައްވައިފައިވާ ބޭފުޅެކެވެ.
ޝަމީމާ އެންމެ ބޮޑަށް ފާހަގަ ކުރެވިފައިވަނީ ފެހުމުގެ ދާއިރާއިންނެވެ. އެ ދާއިރާއިން އޭނާ ވަނީ އެތައް ބަޔަކަށް މަސައްކަތް ދަސްކޮށްދެއްވައިފައެވެ. ފެހުމުގެ މަސައްކަތް ތަރައްޤީ ކުރައްވައި އޭނާވަނީ ސްކޫލް ކުދިންގެ ޔުނީފޯމާއި ބެޖާއި އަދި ވެސް މިހެން ގޮސް ހުރިހާ އެއްޗެއް ފައްސަވަން ފަށްޓަވައިފައެވެ. ފެހުމުގެ އިތުރަށް ފަހާފޮށިން މައު ޖެހަން ވެސް އޭނާ ވަނީ އެތައްބަޔަކަށް ދަސްކޮށް ދެއްވައިފައެވެ.
އެ މަސައްކަތް ދަސްކޮށްދެއްވުމަށްޓަކައި އޭނާވަނީ [ސަރަނގު ޖަރީ]ގެ ނަމުގައި ކްލާހެއް ރަޖިސްޓަރީ އެ ކުލާސް މެދުވެރިކޮށް އެތައްބަޔަކު ދާއިރާއަށް ނެރުއްވައިފައެވެ. ފެހުމުގެ ދާއިރާއިން މީހުން ތަމްރީނު ކުރެއްވުމުގެ މަސައްކަތް އޭނާ ފެއްޓެވީ 2005 ވަނަ އަހަރުއެވެ.
