ކުރީގެ ޑިފެންސް މިނިސްޓަރު މޭޖާ ޖެނެރަލް ރިޓަޔާޑް މޫސާ އަލީ ޖަލީލް ޖުމްހޫރީ ޕާޓީއަށް ސޮއި ކުރައްވައިފިއެވެ.
ރައީސް އަބްދުﷲ ޔާމީންގެ ސަރުކާރުގައި ދިފާއީ ވަޒީރުކަންވެސް ކުރެއްވި ޖަލީލް ޖޭޕީއަށް ސޮއި ކުރެއްވުމަށް ފަހު ފޯމު ޙަވާލު ކުރައްވާފައި ވަނީ ޖޭޕީގެ ބާނީ ގާސިމް އިބްރާހިމްގެ އަތްޕުޅަށެވެ. ރައީސް ނަޝީދުގެ ވެރިކަމުގައި ސިފައިންގެ އެންމެ މަތީ ވެރިޔާގެ މަގާމުގައި ހުންނެވި ޖަލީލް ރައީސް ޔާމީންގެ ޑިފެންސް މިނިސްޓަރު ކަމުން ވަކިކުރެއްވި ފަހުން ސިޔާސީ ހަރަކާތްތަކުން ވަނީ ދުވަސްކޮޅަކަށް ދުރަށް ވަޑައިގެންފައެވެ.
ޖަލީލުގެ އިތުރުން ޖޭޕީއަށް ވަނީ ރައްޔިތުންގެ މަޖިލީހުގެ އިތުރު މެމްބަރަކުވެސް ސޮއި ކުރައްވާފައެވެ. އެއީ ނޮޅިވަރަމް ދާއިރާގެ މެމްބަރު ޙުސައިން އަރީފެވެ. އަރީފަކީ މަޖިލީހަށް ޖޭޕީގެ ޓިކެޓުގައި ހޮވުނު މެމްބަރެކެވެ. ނަމަވެސް އަރީފު ވަނީ އެމްޑީއޭއަށް ސޮއި ކުރައްވައި ކުރީގެ ސަރުކާރުގެ އިއްތިހާދުގައި ދުވަސްކޮޅަކު މަސައްކަތް ކުރައްވާފައެވެ.
