2018 ވަނަ އަހަރުގެ ކިޔެވުން ނިމުމާއެކު މިއަދު ރާއްޖޭގެ ހުރިހާ ސްކޫލެއްގައި ދަރިވަރުންނަށް ރިޕޯޓް ފޯމު ދޭންފަށައިފިއެވެ.
މާލެ އާއި އަތޮޅުތަކުގެ ހުރިހާ ސްކޫލްތަކެއްގައި މިއަދު ރިޕޯޓް ފޯމު ދިނުމާއެކު ދަރިވަރުންނަށް މިއަދުން ފެށިގެން ވަނީ އަހަރު އެންމެ ބޮޑު ޗުއްޓީ ލިބިފައެވެ. ބޮޑު ޗުއްޓީއަށް ފަހު ދެން 2019 ވަނަ އަހަރުގެ ކިޔެވުން ފަށާނީ ޖެނުއަރީ 13 ވަނަ ދުވަހުއެވެ. މާލޭގެ ބަޔެއް ސްކޫލްތަކުގައި ހެނދުނުގެ ދަންފަޅީގެ ދަރިވަރުންނަށް ހެދުނު ރިޕޯޓް ފޯމު ހަވާލުކޮށްފައިވާއިރު މެންދުރު ފަހުގެ ދަންފަޅީގެ ދަރިވަރުންނަށްވެސް މެންދުރުފަހު ރިޕޯޓް ފޯމް ހަވާލުކޮށް ނިންމާލާނެއެވެ.
ސްކޫލް ބޮޑު ޗުއްޓީ މިއަދު ލިބުމާއެކު ގިނަބަޔަކު ތައްޔާރު ވަމުންދަނީ ދަރިވަރުންނާއެކު އަހަރީ ޗުއްޓީ ހޭދަކުރުމަށް ރަށުން ބޭރަށް ދިޔުމަށެވެ. އެގޮތުން އަތޮޅުތަކުގެ ދަރިވަރުން ގިނަ އަދަދަކަށް އާންމުކޮށް މާލެ އާއި ރާއްޖެއިން ބޭރަށް ދާއިރު މާލޭގެ ސްކޫލްތަކުގެ ގިނަދަރިވަރުން އަތޮޅުތެރެއަށާއި ރާއްޖެއިން ބޭރަށް ދިޔުމަށް ތައްޔާރު ވެއެވެ.
