ރައްޔިތުންގެ މަޖިލީހުގެ ކުރީގެ މެމްބަރު އަދި މިހާރުގެ ޔޫތު މިނިސްޓަރު ސަރުކާރުގެ ޤާނޫނު ތަންފީޒުކުރާ އިދާރާއަކަށް ދޮގުމަޢުލޫމާތު ދެއްވި ކަމުގެ ކުށް ސާބިތު ނުވާ ކަމަށް ކްރިމިނަލް ކޯޓުން މިއަދު ޙުކުމް ކުރައްވައިފިއެވެ.
އޭނާގެ ބައްޗަށް ދައުލަތުންކުރި ދަޢުވާގައި ބުނެފައިވަނީ ނުހިނގާކަމެއް ހިނގިކަމަށް ބުނެ ޤާނޫނޫ ތަންފީޒުކުރާ އިދާރާއަކަށް ދިނުމުގެ ކުށެވެ. މަހުލޫފު މިއަހަރު ޖެނުއަރީ މަހު ކުރައްވާފައިވާ ޓްވީޓެއްގައި ވިދާޅުވެފައިވަނީ "މާފުށީ ޖަލުގައި ގައިދީން މަރުވަނީކީ ނޫން، ސީދާ މަރަނީ. އެކަށީގެންވާ ފަރުވާ ނުދީ މަރާލަނީ،" ކަމަށެވެ. އެޓްވީޓުގައި އޭނާ ވިދާޅުވެފައިވަނީ އަހަރެއްގެ ތެރޭގައި 10 ގައިދީން މަރުވުމަކީ އެއީ ސީރިއަސް ކަމެއް ކަމަށެވެ.
މި މައްސަ ދައުލަތުގެ ފަރާތުން ކޯޓަށް ހުށަހެޅުމަށްފަހު މިއަދު ބޭއްވި ޙުކުމް އިއްވުމުގެ އަޑުއެހުމުގައި ޤާޒީ ވިދާޅުވީ މަހުލޫފާ ދެކޮޅަށް ކުށްސާބިތުކުރެވޭ ވަރަށް ދައުލަތަށް ހެކި ހުށަހެޅިފައި ނުވާކަމަށެވެ. އަދި މަހުލޫފުގެ ޓްވީޓަކީ ދައުލަތުގެ އިދާރާއަކަށް މަޢޫލޫމަތު ފޯރުކޮށްދެއްވަން ކުރެއްވި ޓްވީޓެއް ކަމެއް ވެސް އެނގެންނެތް ކަމަށެވެ.
