ކުރިއަށް އޮތް 19 ވަނަ ސާކް ސަމިޓް ބޭއްވުމަށް ރާއްޖޭގެ އެހީތެރިކަމަށް ސައުތު އޭޝިއަން އެސޯސިއޭޝަންސް ފޮރ ރީޖަނަލް ކޯޕޮރޭޝަން (ސާކް)ގެ ސެކްރެޓަރީ ޖެނެރަލް އަމްޖަދު ޙުސައިން އެދިވަޑައިގެންފިއެވެ.
އޭނާ މިކަމަށް އެދިވަޑައިގެންވީ މިއަދު ރައީސް އިބްރާހީމް މުޙައްމަދު ޞާލިޙުގެ އަރިހަށް ކުރެއްވި އިޙުތިރާމްގެ ޒިޔާރަތުގައި އެމަނިކުފާނާ ދެއްކެވި ވާހަކަފުޅުގައެވެ.
އޭނާ ވިދާޅުވެފައިވަނީ 19 ވަނަ ސާކު ސަމިޓް ބޭއްވުމަށް ހުރަސްތައް ދިމާވެފައިވާ ކަމަށެވެ. އެކަމާ ބެހޭގޮތުން ރައީސާ މަޝްވަރާ ކުރެއްވުމަށްހު އެ ކަމުގައި ރާއްޖޭގެ އެހީތެރިކަން ބޭނުންވާ ކަމަށް އަމްޖަދު ވިދާޅުވިއެވެ.
އަމްޖަދު އެކަމަށް އެދިވަޑައިގެންނެވުމުން ރައީސް ޞާލީހުވަނީ އަށް ޤައުމު ހިމެނޭ ސާކްގެ މެމްބަރު އެހެން ޤައުމުތަކާއެކު ވާހަކަ ދައްކައިގެން ސަމިޓް ބޭއްވޭނެ އިންތިޒާމެއް ހަމަޖެއްސެވުމުގައި ރާއްޖޭގެ ފުރިހަމަ އެއްބާރުލުން ދެއްވާނެ ކަމުގެ ޔަޤީންކަން ދެއްވައިފައި ކަމަށް ރައީސް އޮފީހުން ވަނީ ވިދާޅުވެފައެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި މިބައްދަލުވުމުގައި ރައީސުލްޖުމްހޫރިއްޔާ ވަނީ އިއްޔެ ރައީސުލްޖުމްހޫރިއްޔާ ކަމުގެ ހުވައި ކުރެއްވުމަށް ބޭއްވެވި ރަސްމިއްޔާތުގެ ދަޢުވަތު ގަބޫލުފުޅު ކުރައްވައި ރާއްޖެ ވަޑައިގެންނެވީތީވެ ސެކްރެޓަރީ ޖެނެރަލަށް ޝުކުރުއަދާކުރައްވާފައެވެ. އަދި ސެކްރެޓަރީ ޖެނެރަލް ވެސް ވަނީ މި ޚާއްޞަ ޝަރަފުވެރި ރަސްމިއްޔާތަށް ދަޢުވަތު އެރުވި ކަމަށްޓަކައި ރައީސުލްޖުމްހޫރިއްޔާއަށް ޝުކުރު އަދާކުރައްވާފައެވެ.
