ރާއްޖޭގެ އައު ރައީސުލްޖުމްހޫރިއްޔާ ޢިބްރާހީމް މުޙައްމަދު ޞާލިޙާއި އެމަނިކުފާނުގެ ނާއިބު ފައިޞަލް ނަސީމު މަޤާމުގެ ޤާނޫނީ ހުވައި ދެންމެ ކުރައްވައިފިއެވެ.
ގަލޮޅު ދަނޑުގައި މިހާރު ކުރިއަށްދާ މި ދެބޭފުޅުން ހުވައި ކުރެއްވުމުގެ ރަސްމިއްޔާތުގައި ދެބޭފުޅުންނަށް ހުވައިލައިދެއްވީ ރާއްޖޭ އުއްތަމަ ފަނޑިޔާރު ޑރ. އަޙުމަދު ޢަބްދުﷲ ދީދީއެވެ. މަޤާމުގެ ހުވައި ކުރެއްވުމަށްފަހު އެދެބޭފުޅުން ވެސް ވަނީ ހުވައިގެ އިޤުރާރުގައި ސޮއިކުރައްވައިފައެވެ.
ހުވައި ކުރެއްވުމަށްފަހު ރައީސް އިބްރާހީމް މުޙައްމަދު ޞާލިޙު ޤައުމާ މުޚާތަބު ކުރައްވައި ވާހަކަފުޅު ދައްކަވާ ގޮތަށްވަނީ ހަމަޖެހިފައެވެ.
ދިވެހި ޖުމްހޫރިއްޔާގެ ހަތްވަނަ ރައީސްގެ ގޮތުގައި އިބްރާހީމް މުޙައްމަދު ޞާލީހު މިއަދު ހުވައި ކުރެއްވީ ސެޕްޓެމްބަރު 23 ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގައި ރައީސް ޔާމީނާ ވާދަކުރައްވައި ބޮޑު ތަފާތަކުން ކާމިޔާބު ކުރައްވައިގެންނެވެ.
އިބްރާހީމް މުޙައްދު ޞާލިޙު ވެސް ވެރިކަމަށް ވަޑައިގެންނެވީ ރައްޔިތުންނަށް ފޮނި އުންމީދުތަކެއް ދެއްވަމުންނެވެ. އެހެން ކަމުން އެމަނިކުފާނުގެ ވެރިކަމުގެ ފައިދާއާއި ކުރިއެރުން އެއްވެސް ރައްޔިތަކު އިސްތިސްނާ ނުވާނެގޮތަށް ލިބިގެންދާނެ ކަމަށް އެމްޑީޕީން ވަނީ ކުރިން ބުނެފައެވެ.
ރައީސް ކަމުގެ ހުވައި ކުރެއްވުމާއެކު މިއަދުން ފެށިގެން ރާއްޖޭ ރައީސުލްޖުމްހޫރިއްޔާ އަކީ އިބްރާހީމް މުޙައްމަދު ޞާލިޙެވެ.
