ރައީސް މުންތަޚަބު އިބްރާހީމް މުޙައްމަދު ޞާލިޙާއި އެމަނިކުފާނުގެ ނާއިބު ފައިޞަލް ނަސީމް ހުވައި ކުރެއްވުމުގެ އުފަލުގައި ސިނަމާލެ ބްރިޖުގައި ދުވުމެއް ބާއްވަން ނިންމަވައިފިއެވެ.
އެމްޑީޕީން ބުނެފައިވަނީ މި ދުވުމުގައި ބައިވެރިވުމަށް އެއްވެސް ފީއެއް ދައްކާކަށް ނުޖެހޭނެ ކަމަށެވެ. ބައިވެރިން ލާންޖެހޭނީ އަމިއްލަ ޓީޝާޓެވެ. ޓީޝާޓުގެ ކުލަ ފެއްސާއި، ރަތާއި ހުދުގެ ތެރެއިން ކޮންމެވެސް އެއްކުލައަކަށް ވާންޖެހޭ ކަމަށް އިންތިޒާމް ކުރާ ފަރާތްތަކުން މަޢުލޫމާތު ދެއްވިއެވެ.
މިދުވުން ބޭއްވުމަށް ހަމަޖެހިފައިވަނީ މިމަހު 18 ވަނަ ދުވަހު ހަވީރު 4:00 ގައެވެ. މިއީ "ދުޅަހެޔޮ ހަށިހެޔޮ އީދު" ގެ ނަމުގައި ކުރިއަށް ގެންދާ ފެސްޓިވަލްގެ ތެރޭގައި ހިމެނޭ ޙަރަކާތެކެވެ.
"ބްރިޖު ރަން" ފަށާނީ ބްރިޖު ސަރަޙައްދުންނެވެ. އެތަނުން ފަށައިގެން ހުޅުމާލޭ ބޮޑުމަގުގައި ކަނޑައަޅާފައިވާ ހިސާބަކަށް ގޮސްފައި އެނބުރާލާފައި ގޮސް ދުވުން ނިންމާލުމަށް ރާވާފައިވަނީ މާލޭ ސިނާޢީ ސަރަޙައްދަށެވެ. މިދުވުމުގައި ހުރިހާ ޢުމުރެއްގެ މީހުންނަށް ބައިވެރިވެވޭނެއެވެ.
ކުޅިވަރުގެ ފެސްޓިވަލުގެ ބައެއް ޙަރަކާތްތަކުގައި ރައީސް ނަޝީދާއި، ރައީސް ޞާލިޙާއި، ކުރީގެ ބައެއް ރައީސުން ވެސް ބައިވެރިވެ ވަޑައިގަންނަވާނެއެވެ. މި ޙަރަކާތުގައި ރައީސް ޔާމީން ވެސް ބައިވެރިވެ ވަޑައިގަންނަވާނެ ކަމަށް އުންމީދު ކުރައްވާ ކަމަށް އެމްޑީޕީން ބުނެފައިވެއެވެ.
