ކުރިއަށްއޮތް ރައްޔިތުންގެ މަޖިލީހުގެ މެމްބަރު ކަމަށް ޕީޕީއެމްގެ ކެންޑިޑޭޓެއްގެ ގޮތުގައި ކުރިމަތި ލައްވާނެ ކަމަށް ޑިފެންސް މިނިސްޓަރ އާދަމް ޝަރީފް ޢުމަރު މިއަދު ވިދާޅުވެއްޖެއެވެ.
ކޯސްޓްގާޑް ބިލްޑިންގައި ބޭއްވި ބައްދަލު ވުމެއްގައި ނޫސް ވެރންނަށް މަޢުލޫމާތު ދެއްވަމުން އެމަނިކުފާނު ވިދާޅުވީ މަޖިލީހަށް ކުރިމަތި ލައްވަން ނިންމެވީ ރާއްޔިތުންނާ ވީހާވެސް ގާތުން ޤައުމަށް ޚިދުމަތް ކޮށްދެއްވުމަށް ކަމަށް އެމަނިކުފާނު ވިދާޅުވިއެވެ. އެމަނިކުފާނު ކުރިމަތި ލައްވަނީ ރ. މަޑުއްވަރީ ދާއިރާއަށް ކަމަށް މަޢުލޫމާތު ލިބިފައިވެއެވެ. އެހެންނަމަވެސް އެމަނިކުފާނު އެކަން ކަށަވަރު ނުކޮށްދެއްވައެވެ.
މިނިސްޓަރ ޝަރީފުގެ އިތުރަށް ހައުސިން މިނިސްޓަރު ޑރ. މުޙައްމަދު މުޢިއްޒު ވެސް މަޖިލީހަށް ކުރިމަތިލައްވާ ގޮތަށް ނިންމަވައިފައިވާ ކަމަށް މަޢުމޫމާތު ލިބިފައިވެއެވެ. ރައްޔިތުންގެ މަޖިލީހުގެ އިންތިޚާބު އޮންނާނީ އަންނަ އަހަރު މާރިޗިމަހު ފަހުކޮޅުއެވެ.
މަޖިލިސް އިންތިޚާބަށް ތައްޔާރުވުމުގެ ގޮތުން، ގުޅިފައިވާ އިއްތިހާދުން ގެންދަނީ މަޝްވަރާތައް ބާއްވަމުނެވެ. އެހެންނަމަވެސް ގޮނޑިތައް ބަހާނެ ގޮތާއި، ދާއިރާތައް ކަނޑައެޅުން އަދި ފައިނަލް ނުވާކަމަށް މަޢުލޫމާތު ލިބިފައިވެއެވެ. އިއްތިހާދުން އެމަޝްވަރާ ކުރަމުންދިޔަސް ޕީޕީއެމް އަދި ފެންނަނީ ވަރަށް މަޑުން އޮތްތަނެވެ.
