ގުޅިފައިވާ ކޯލިޝަންގެ ހަތަރު ލީޑަރުންގެ ބައްދަލުވުމެއް ހޮޓެލް ޖެންގައި މިއަދު ބާއްވާ ގޮތަށް ހަމަޖައްސަވައިފިއެވެ.
އެމްޑީޕީގެ ރައީސް މުޙައްމަދު ނަޝީދާއި، ރައީސް މައުމޫން ޢަބްދުލްޤައްޔޫމާއި، ޢަދާލަތު ޕާޓީގެ ރައީސް ޝައިޚް ޢިމްރާނާއި، ޖުމްހޫރީޕާޓީގެ ލީޑަރު ޤާސިމް އިބްރާހީމްގެ މި ބައްދަލުވުން އޮންނާނީ މިއަދު މެންދުރުފަހު 2:00 ގައި ކަމަށް މަޢުލޫމާތު ލިބިފައިވެއެވެ.
މިއީ ރައީސް މުންތަޚަބު އިބްރާހީމް މުޙައްމަދު ޞާލިޙާއި އެމަނިކުފާނުގެ ނާއިބު ފައިސަލް ނަސީމް ހުވައި ކުރެއްވުމުގެ ކުރިން މި 4 ބޭފުޅުން ބާއްވާ ޚާއްސަ ބައްދަލުވުމެއް ކަމަށް މަޢުލޫމާތު ލިބިފައިވެއެވެ.
މި ބޭފުޅުން އިއްތިހާދެއްގެ ގޮތުގައި ކުރިން މަސައްކަތް ކުރައްވައިފައިވަނީ ރާއްޖެއިން ބޭރާއި ޖަލު ތަކުގައި ތިއްބަވައިގެންނެވެ. މި 4 ބޭފުޅުންނަކީ ވެސް ޖަލު ޙުކުމް އިއްވައި އެ ޙުކުމުން ބައެއް ތަންފީޒު ކުރެއްވުމަށްފަހު ސްޕްރީމް ކޯޓުން މިނިވަން ކުރައްވާފައިވާ 4 ބޭފުޅުންނެވެ.
ގިނަ ދުވަސްތަކަށްފަހު މި 4 ބޭފުޅުން އެއްތަނަކުން ބައްދަލު ކުރައްވައި މައިގަނޑު ގޮތެއްގައި މަޝްވަރާ ކުރައްވާނެ ކަމަށް ވަނީ އިބްރާހީމް މުޙައްމަދު ޞާލިޙުގެ ކެބުނެޓް އެކުލަވާލެއްވުމާ ބެހޭގޮތުންނެވެ. މީގެ ކުރިން ރައީސް ނަޝީދުވަނީ ކެބިނެޓް އެކުލަވާލެއްވުމުގެ ފުރިހަމަ އިޚްތިޔާރު އިންތިޚާބީ ރައީސް އިބްރާހީމް މުޙައްމަދު ޞާލިޙަށް ދެއްވަން ޖެހޭނެ ކަމަށެވެ.
