މިއަދަކީ ރާއްޖޭގެ ނޫސްވެރިންނާއި ރައްޔިތުންނަށް ގެއްލިފައިވާ ޚިޔާލް ފާޅުކުރުމުގެ މިނިވަންކަން އަލުން ލިބުނު ދުވަސް ކަމަށް ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ ކުރީގެ މެމްބަރު ޢަބްދުﷲ ޝާހިދު ވިދާޅުވެއްޖެއެވެ.
ނޫސްވެރިންނަށް މަޢުލޫމާތު ދެއްވަމުން ޝާހިދު މިއަދު ވިދާޅުވީ، އިބްރާހީމް މުޙައްމަދު ޞާލިހުގެ ސަރުކާރު ތެރެއިން ރައްޔިތުންނަށް ޚިދުމަތް ކުރެއްވުމަށް މިއަދުން ފެށިގެން މަޖިލީހުން އިސްތިއުފާ ދެއްވައިފި ކަމަށެވެ. ދެން ފެންނާނީ އިބްރާހީމް މުޙައްމަދު ޞާލިހުގެ ސަރުކާރުން އެމަނިކުފާނާ ޙަވާލު ކުރެއްވި ކޮންމެ މަސައްކަތެއްވެސް ކުރައްވާތަން ކަމަށް ޝާހީދު ވިދާޅުވިއެވެ.
އޭނާ ވިދާޅުވީ މަޖިލީހުން އޭނާ މިއަދު އިސްތިއުފާ ދެއްވިއިރު އުވާލުމަށްޓަކައި މަޖިލީހަށް އޭނާ ހުށެޅުއްވި އަބުރު ރައްކާތެރި ކުރުމާއި ޚިޔާލުފާޅު ކުރުމުގެ މިނިވަންކަމާ ބެހޭ ޤާނޫނޫ އުވައިލުމަށް ފާސްކުރައްވައިފައިވާ ކަމަށެވެ. އެ ކަމަށްޓަކައި ޝާހިދު ވަނީ ވޯޓު ދެއްވި މެމްބަރުންނަށް ޝުކުރު އަދާ ކުރައްވާ ކަމަށެވެ.
"ރައްޔިތުންގެ މަޖިލީހުގެ ވަރަށްގިނަ ޢަދަދެއްގެ މެމްބަރުންގެ ތާއީދާއެކު މިއަދު އެ ފާސްވެގެންދިޔައީ ވަރަށް ޚާއްސަ ޤާނޫނެއް،" އޭނާ ވިދާޅިވިއެވެ.
ޝާހިދު ވިދާޅުވީ އެ ޤާނޫނަކީ ޤާނޫނު ޢަސާސީން ރައްޔިތުންނަށް ލިބިދީފައިވާ މިނިވަންކަން ނައްތާލައިފައިވާ ޤާނޫނެއް ކަމަށެވެ. އެހެންނަމަވެސް އެޤާނޫ އުވައިލުމުން އަލުން ރައްޔިތުންނާއި ނޫސްވެރިންނަށް މިނިވަންކަން ލިބިގެން ހިނގައްޖެ ކަމަށް އޭނާ ވިދާޅުވިއެވެ.
"އެއީ ޤާނޫނު ޢަސާސީގެ އެތައް މާއްދާތަކަކުން ރައްޔިތުންނަށް ލިބިދީފައިވާ ނިމިވަންކަން ހިފަހައްޓައި ނަތައްލާފައިވާނައްތާލުން މިއަދު އަލުން އަނބުރައި ރާއްޖޭގެ ޖާނަލިސްތުންނަށް، ރާއްޖޭގެ ރިޕޯޓަރުންނަށް ރާއްޖޭގެ މީޑިއާގައި މަސައްކަތްކަތް ކުރައްވާ ހުރިހާ ބޭފުޅުންނަށް ރާއްޖޭގެ ބްލޮގަރުންނަށް، ރާއްޖޭގެ ރައްޔިތުންނަށް އަލުން އަނބުރާ އެމިނިވަންކަން މި ހޯދައިދެވުނީ،" ޝާހިދު ވިދާޅުވިއެވެ.
އޭނާ ވިދާޅުވީ އެ ޤާނޫނު އުވާލެއްވުމަށް ހުށަހެޅުއްވީ "ރާއްޖޭގެ ރައްޔިތުންގެ ކަރުގައި، ނޫސްވެރިންގެ ކަރުގައި މީޑީއާގެ މަސައްކަތްކުރައްވާ ހުރިހާ ބޭފުޅުންގެ ކަރުފުޅުގައި އަޅުވައިފައިވާ ބުރަ ހިލިހިލާ ތަކެއް ބުރިކޮށްލުމުގެ" މަޤުސަދުގައި ކަމަށެވެ. މިއަދު އެކަން ވެގެން އެދިޔައީ ކަމަށާއި ރައީސް ޔާމީން އެ ބިލް ތަޞްދީޤު ނުކުރައްވައިފި ކަމަށްވާނަ އިބްރާހީމް މުޙައްމަދު ޞާލިޙު ހުވައި ކުރެއްވުމަށްފަހު އެބިލް ތަޞްދީގު ކުރައްވާނެ ކަމަށް ވެސް ޝާހިދު ވިދާޅުވިއެވެ.
