އިންޑިއާގެ ޗެންނާއީގެ އިރުން ގާތްގަޑަކަށް 470 ކިލޯމީޓަރު ދުރުން އުފެދިފައިވާ ތޫފާން "ގާޖާ" އިތުރަށް ބާރުގަދަވެފައިވާ ކަމަށް މެޓު އޮފީހުން ވިދާޅުވެއްޖެއެވެ.
މެޓުން ވިދާޅުވެފައިވަނީ ކުރިއަށްއޮތް 12 ގަޑިއިރު ތެރޭގައި މިތޫފާން އިތުރަށް ބާރުގަދަވާނެ ކަމަށެވެ. ތޫފާން މިހާރު ދަތުރު ކުރަމުންދަނީ ހުޅަނގު ހުޅަނގު ދެކުނަ ކަމަށާއި، މާދަމާގެ ވަގުތެއްގައި އިންޑިއާގެ ޓެމިލްނާޑޫގެ އައްސޭރި ފަށަށް ތޫފާން އަރާނެ ކަމަށް ލަފާ ކުރެވޭ ކަމަށް ވެސް މެޓު އޮފީހުން ވަނީ ވިދާޅުވެފައެވެ. "މިތޫފާނުގެ ސީދާ އަސަރެއް ރާއްޖެއަކަށް ނުކުރާނެ" ކަމަށް ވެސް މެޓުން ވަނީ ވިދާޅުވެފައެވެ.
މާދަމާގެ ހެނދުނާ ހަމައަށް ރާއްޖޭގެ މޫސުން ލަފާކުރާ ގޮތަށްބަލާއިރު ދެކުނުގެ އެކިހިސާބަށް ކެރީގެއަސަރުފޯރާނެއެވެ. އެހެންހިސާބުތަކުގެ މޫސުން ޢާންމުގޮތެއްގައި ރަނގަޅުވާނެ ކަމަށް މެޓުންވަނީ ވިދާޅުވެފައެވެ.
ހުޅަނގާއި ހުޅަނގުއުތުރުން އުތުރުގެ އަތޮޅުތަކަށް ގަޑިއަކު 05 މޭލާ 13 މޭލު ދެމެދުގެ ބާރުމިނުގައި ވައިޖެހެނެ އެވެ. އެހެންހިސާބުތަކަށް ވައިޖެހެނީ ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައެވެ. ކެރިގަނޑުގައި ގަޑިއަކު 30 މޭލަށް ވައިގަދަވުން އެކަށީގެންވާ ކަމަށް މެޓުން ވިދާޅުވިއެވެ.
އުތުރު އަތޮޅުތަކުގެ ކަނޑުތައް އާދައިގެވަރަކަށް މަޑުވާނެއެވެ. އެހެން ހިސާބުތަކުގެ ކަނޑުތައް އާދައިގެވަރަކަށް ގަދަވެފައި ވިލާގަނޑުގައި ގަދަވާނެ ކަމަށް ވެސް މެޓުންވަނީ ވިދާޅުވެފައެވެ.
