މިއަހަރުގެ ހަކުރުބަލީގެ ދުވަހުގެ ޙަރަކާތްތައް އަދަޔާޚިލާފު ގޮތަކަށް ފަށައިފިއެވެ. ދެދުވަހުގެ މުއްދަތަށް ކުރިއަށް ގެންދާ މިޙަރަކާތްތައް ފަށައިފައިވަނީ ސަރުކާރުގެ އޮފީސްތަކުގައި މިއަދު ހެނދުނު ބޭއްވި "ގޯބުލޫ ޗެލެންޖު" ކަސްރަތުގެ ޙަރަކާތްތަކާއި، "ހެލްތީ ބްރޭކްފާސްޓް ޗެލެންޖު" ގެ ގޮތުގައި ހެނދުނު ބޭއްވި ނާސްތާ އަކުންނެވެ.
ހަކުރުބަލީގެ ދުވަހުގެ ގޮތުގައި ދުނިޔޭގައި ފާހަގަކުރަނީ ކޮންމެ އަހަރެއްގެ ވެސް ނޮވެމްބަރު މަހުގެ 14 ވަނަ ދުވަހެވެ. މިދުވަހުގެ ރަސްމީ ޙަރަކާތްތައް ފެށުމަށް ހަމަޖެހިފައިވަނީ މިމަހުގެ 16 ވަނަ ދުވަހުއެވެ. އެ ޙަރަކާތްތައް މާލޭގައި ރަސްމީކޮށް ކުރިއަށް ގެންދާނީ ރަސްފަންނުގައެވެ. އެ ޙަރަކާތްތައް ކުރިއަށްދާނީ ހަވީރު 4:00 އިން 6:00 އަށެވެ.
އެ ޙަރަކާތައް ފެށުމުގެ ގޮތުން "ބްރީތު ލައިފް" އިން ބޮޑީފުލައިގެ ޙަރަކާތްތަކެއް ކުރިއަށް ގެންދިޔުމަށްވަނީ ހަމަޖެހިފައެވެ. އަދި ޒުންބާ، ޕިލޮކްސިން، ފްރީސްޓައިލްގެ ކަސްރަތު ޙަރަކާތްތައް ވެސް ކުރިއަށްދާނެ ކަމަށް އެޗުޕީއޭއިން ވިދާޅުވެފައިވެއެވެ. އޭގެ އިތުރަށް މާޝަލް އާޓްސްއާއި، ހަކުރު ބައްޔާބެހޭ ގޮތުން މަޢޫލޫމާތު ދިނުމުގެ ޙަރަކާތްތައް ވެސް ކުރިއަށް ގެންދާ ގޮތަށް ހަމަޖެހިފައިވާ ކަމަށް އެޗުޕީއޭ އިން ވިދާޅުވެފައިވެއެވެ.
މި ޙަރަކާތައް ބޭއްވުމުގެ މަޤުޞަދަކީ ހަކުރު ބައްޔާ ބެހޭ މަޢުލޫމާތު ފޯރުކޮށްދީ އެއަށް މީހުން ހޭލުންތެރި ކުރުވުމެވެ. މިއަހަރުގެ ހަކުރުބަލީގެ ޝިޢާރަކީ "ހަކުރު ބައްޔާއި ޢާއިލާ" އެވެ.
