އަބުރު ރައްކާތެރި ކުރުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ ސަރުކާރުން ކުރައްވަމުން ގެންދެވި ވައްކަމުގެ މައްސަލަތައް ރައްޔިތުންނާ ހަމައަށް އަޔަނުދިނުމަށް "ގެންގުޅުއްވި" ޤާނޫނެއް ކަމަށް ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު ޢަބްދުﷲ ޝާހިދު ވިދާޅުވެއްޖެއެވެ.
"ޢަބްދުﷲ ޔާމީން މިޤާނޫނު ތަޞްދީޤު ކުރައްވައި ޤާނޫނެއްގެ ގޮތުގައި މިގެންގުޅުއްވީ އެމަނިކުފާނުގެ ސަރުކާރުން ކުރައްވަމުން ގެންދެވި ވައްކަމުގެ މައްސަލަތައް ރައްޔިތުންނާ ހަމައަށް އަޔަނުދިނުނަށްޓަކައި. ސިއްރު ކުރެއްވުމަށްޓަކައި،" ޝާހިދު ވިދާޅުވިއެވެ.
އެކަންކަން ސިއްރު ކުރެއްވުމަށް ކުރެއްވި މަސައްކަތްތަކުގެ ސަބަބުން ރާއްޖޭގެ ވަރަށް ގިނަ ބަޔަކަށް އަނިޔާތަކެއް ލިބުނު ކަމަށާއި އެނިޔާތައް އެންމެ ބޮޑަށް ލިބުނު މީހުންނަކީ ދިވެހި ނޫސްވެރިން ކަމަށް ވެސް ޝާހިދު ވިދާޅުވިއެވެ. "އެ އަނިޔާތައް އެންމެ ބޮޑަށް ތަޙައްމަލް ކުރެއްވި ބޭފުޅުންނަކީ ރާއްޖޭގެ މީޑިއާގައި މަސައްކަތް ކުރައްވާ ހިތްވަރުގަދަ ނޫސްވެރިން. ޖާނަލިސްޓުން، ބޮލޮގަރުން، އަދި ރާއްޖޭގެ ޓީވީ ސްޓޭޝަންތައް،" އޭނާ ވިދާޅުވިއެވެ.
ޝާހިދު ވިދާޅުވީ އެ ޤާނޫނުގެ ސަބަބުން ރާއްޖޭގެ ޓީވީސްޓޭޝަންތައް ވަނީ އެތައް މިލިއަން ރުފިޔާއަކުން ޖުރިމާނަ ކުރެވިފައި ކަމަށެވެ. އެހެންނަމަވެސް ﷲގެ އިރާދަފުޅުން އެކަންކަމް މިހާރު މިވަނީ ހުއްޓުމަކަށް ގެނެވިފައި ކަމަށް ޝާހިދު ވިދާޅުވިއެވެ. އެއީ އުވައިލުމަށް މަޖިލީހަށް ޝާހީދު ހުށަހެޅުއްވި އެ ޤާނޫނު ރައްޔިތުންގެ މަޖިލީހުން މިއަދު ފާސް ކުރައްވައިފައިވާތީއެވެ.
ޝާހިދު ވިދާޅުވީ އިބްރާހީމް މުޙައްމަދު ޞާލިހުގެ ރިޔާސީ މެނިފެސްޓީގެ އެންމެ އިސް އެއްކަމެއްގެ ގޮތުގައި ހިމަނާފައިވަނީ ޚިޔާލުފާޅު ކުރުމުގެ މިނިވަންކަން ޤާނޫނު އަސާސީގެ އިމުގެ ތެރޭގައި އެއޮތް މިންވަރަށް ރައްޔިތުންނަށް ފުރިހަމައަށް ދޫކޮށްލެވުން ކަމަށެވެ. މިއަދު ފެނިގެން ދިޔައީ އޭގެ ފުރަތަމަ ފިޔަވަޅު ކަމަށް ވެސް ޝާހިދު ވިދާޅުވިއެވެ. "ރައީސް އިބްރާހީމް މުޙައްމަދު ޞާލިޙުގެ ސަރުކާރު ވެގެންދާނީ ހުޅުވާލެވިފައިވާ ސަރުކާރަކަށް. އެމަންޒަރު މިއަދު ރައްޔިތުންގެ މަޖިލީހުން ފެނިގެން މިދިޔައީ،" ޝާހިދު ވިދާޅުވިއެވެ.
އޭނާ ވިދާޅުވީ ރައީސް އިބްރާހީމް މުޙައްމަދު ޞާލިޙުގެ ސަރުކާރު ވެގެންދާނީ ފާޑުކިޔުމަށް މަރުޙަބާ ކިޔާ ސަރުކާރަކަށް ކަމަށެވެ. ރައްޔިތުން ސަރުކާރަށް ފާޑުކިޔުމުން އެކަން ހުއްޓުވަން މަސައްކަތްކުރުމަކީ ރައްޔިތުންގެ "ޓެކްސް ފައިސާއިން މުސާރަ ނަގައިގެންތިބޭ ބަޔަކު ކުރަން ހެޔޮވާވަރުގެ ކަމެއްނޫން" ކަމަށް ވެސް ޝާހިދު ވިދާޅުވިއެވެ. އެކަން ރައްޔިތުން ޤަބޫލު ނުކުރާނެކަން "އަޅުގަނޑުމެންނަށް ފެނިގެން ހިނގައްޖެ. ރައްޔިތުންގެ ފާޑުކިޔުމަށް އިބްރާހީމް މުހައްމަދު ޞާލިޙުގެ ސަރުކާރުން މަރުޙަބާ ކިޔާނެ،" ޝާހިދު ވިދާޅުވިއެވެ.
