ލީބިޔާގެ އިރުމައްޗާއި ހުޅަނގުގައި ގާއިމުކޮށްފައިވާ ދެ ސަރުކާރުގެ އިސްވެރިން ފަސް މަސްދުވަހުގެ ތެރޭގައި ފުރަތަމަ ފަހަރަށް އިއްޔެ ބައްދަލުކުރައްވައިފިއެވެ. ޓްރިޕޮލީގައި ގާއިމުކޮށްފައިވާ ގައުމީ އެއްބައިވަންތަކަމުގެ ސަރުކާރުގެ ބޮޑުވަޒީރު ފާއިޒު އައްސައްރާޖު ވަނީ އިޓަލީން އިސްނަގައިގެން ޕަލެރްމޯގައި ކުރިއަށް ގެންދިޔަ ސުލްހައިގެ ވާހަކަތަކަށް ފަހު، އަންނަ އަހަރު އިންތިޚާުބު ބޭއްވުމަށް އދ. އިން ކުރާ މަސައްކަތަށް ތާއީދުކުރައްވާނެކަން ހާމަކުރައްވާފައެވެ.
ހުޅަނގުގެ ތާއީދު ލިބިގެން އަދި ނޭޓޯގެ ވައިގެ ބާރުގެ އެހީތެރިކަމާއެކު މީގެ ހަތް އަހަރު ކުރުން ލީބިޔާގެ ޒައީމު ކާނަލް މުޢައްމަރު އަލްޤައްޒާފީގެ ވެރިކަން ވައްޓާލިފަހުން ލީބިޔާ އެއްވެސް ސަރުކާރަކަށް މުޅި ގައުމުގެ މައްޗަށް ވެރިކަން ހިންގިފައި ނުވެއެވެ. ހަތިޔާރުއެޅި ޖަމާއަތްތަކުން ހަނގުރާމަކުރަމުންދާއިރު، ވާދަވެރިން ވަނީ އަމިއްލަ ސަރުކާރުތައް ގާއިމުކޮށްފައެެވެ.
ލީބިޔާގައި ހަނގުރާމަކުރާ ވާދަވެރި ފަރާތްތަކުގެ މެދުގައި އޮތް ދެކޮޅުވެރިކަމާ، ޑިޕްލޮޓިކް ގޮތުން މައްސަލަ ނާޒުކުވަރަށް ބަލާއިރު، ޕަލެރްމޯ ބައްދަލުވުން ކުރިއަށް ގެންދެވުމަކީވެސް ކާމިޔާބީއެެއް ކަމުގައި ގިނަ ބަޔަކު ދެކެއެވެ.
ލީބިޔާގހުޅަނގުގައި ގާއިމުކޮށްފައިވާ، އަދި ބައިނަލް އަގްވާމީގޮތުން ގަބޫލުކުރާ ސަރުކާރުގެ ބޮޑުވަޒީރު ފާއިޒު އައްސައްރާޖާއި، އިރުމަތީގައި ވެރިކަންކުރަމުންދާ ސަރުކާރުގެ ކޮމާންޑަރު ޚަލީފާ ޙަފްތަރު ވަނީ އިއްޔެ ޕަލެރްމޯގައި ބައްދަލުކުރައްވާފައެެވެ. އދ. އިން 2019 ވަނަ އަހަރު ލީބިޔާގައި ބާއްވަން ރާވާފައިވާ އިންތިޚާބަށް އިއްޔެ އައްސައްރާޖު އެއްބަސްވެވަޑައިގެންނެވި އިރު ޙަފްތަރުވަނީ އެކަމަށް މާކުރިން އާނބަސް ވިދާޅުވެފައެވެ.
އދ. އިން ލީބިޔާއަށް ކަނޑައަޅާފައި ހުންނަވާ މަންދޫބު ޣައްސާން ސަލާމާ ވަނީ އިއްޔެގެ އެއްބަސްުވުމަށް ތައުރީފުކުރައްވައި، އެކަމާ އުފާކުރައްވާކަން ހާމަކުރައްވާފައެވެ.
"އެހެންކަމުން، އަހަރެން ބަލަނީ މިއީ އަހަރުމެން އެންމެން ގުޅިގެން ލީބިޔާއަށް ހަމަޖެހުން ގެނެސް، ލީބިޔާގެ ރައްޔިތުންނަށް ފާގަތިކަމާއި ރައްކާތެރިކަން ހޯދައިދިނުމަށް ކުރާ މަސައްކަތަށް ލިބުނު ކާމިޔާބީއެއް ކަމުގައި." ސަލާމާ ވިދާޅުވިއެވެ.
