2019 ވަނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅި ބަޖެޓް ދިރާސާ ކުރަން އެކުލަވާލި ކޮމިޓީގެ މުގައްރިރަކަށް މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) އަދި އެ ކޮމިޓީގެ ނައިބަކަށް ވިލުފުށީ ދާއިރާގެ މެމްބަރު ރިޔާޒް ރަޝީދު ހަމަޖައްސައިފިއެވެ.
ބަޖެޓް ކޮމިޓީގެ މުގައްރިރަކަށް ހަމަޖެއްސެވި މަވޯޓާ ޝަރީފަކީ މަޖިލީހުގައި އެމްޑީޕީއަށް ނިސްބަތްވެވަޑައިގަންނަވާ މެމްބަރެކެވެ. ނައިބަކަށް ހަމަޖެއްސެވި ރިޔާޒަކީ ޕީޕީއެމްގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރެވެ. ނަމަވެސް ރިޔާސީ އިންތިޚާބުގެ ވޯޓުގެ ފަހުން ރިޔާޒްވެސް ފެންނަމުން ދަނީ އިދިކޮޅު ހަރަކާތްތަކުންނެވެ.
ރައްޔިތުންގެ މަޖިލީހުގެ ބަޖެޓް ކޮމިޓީން ދިރާސާ ކުރަން ފަށަނީ ދައުލަތުން ފޮނުވި 29 ބިލިއަން ރުފިޔާގެ ބަޖެޓެކެވެ. ރައީސް ޔާމީންގެ ސަރުކާރުގެ ފިނޭންސް މިނިސްޓަރު ބިލު މަޖިލީހަށް ހުށަހެޅުއްވި ނަމަވެސް އެ ބިލަކީ އިންތިޚާބީ ރައީސް އިބްރާހިމް މުޙަންމަދު ސޯލިޙްގެ އުފައްދަވާ ސަރުކާރުގެވެސް މަޝްވަރާގެ މަތިން ހަދާފައިވާ ބަޖެޓެކެވެ.
ލަފާ ކުރައްވާ 2019 ގެ ބަޖެޓުގައި ދައުލަތަށް އެކިގޮތްގޮތުން 23 ބިލިއަން ރުފިޔާ ލިބޭނެކަމަށް ޖަހާފައި އޮތެވެ. އަދި ނިމިގެންމިދާ ފަސް އަހަރުގެ ދައުރުގައިވެސް ތަރައްގީގެ ވަރަށް ބޮޑެތި މަޝްރޫއުތަކެއް ހިންގައި ގިނަ ކާމިޔާބުތަކެއް ހޯދިފައިވާ ކަމަށް ބަޖެޓް ހުށަހަޅުއްވަމުން ފިނޭންސް މިނިސްޓަރު މުނައްވަރު ވިދާޅުވިއެވެ.
