އިބްރާހީމް މުޙައްމަދު ޞާލިޙުގެ ސަރުކާރުގައި ސިޔާސީ މަޤާމްތަކަށް ކުރައްވާނެ ހޭދަ 16 އިންސައްތަ މަދުވާނެ ކަމަށް އިންތިޚާބީ ރައީސްގެ ތަރުޖަމާނު މާރިޔާ އަޙުމަދު ދީދީ މިއަދު ވިދާޅުވެއްޖެއެވެ.
ނޫސްވެރިންނަށް މަޢުލޫމާތު ދެއްވަމުން އޭނާ މިއަދު ވިދާޅުވީ އާއާ ސަރުކާރުގައި އުފައްދާނީ ޖުމްލަ 19 މިނިސްޓްރީ ކަމަށެވެ. އޭގެ ތެރޭގައި އަލަށް އުފައްދަވާ މިނިސްޓްރީތަކަކީ، މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖް، ހަޔަ އެޑިއުކޭޝަން މިނިސްޓްރީ، މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ، މިނިސްޓްރީ އޮފް ނެޝަނަލް ޕްލޭނިން އެންޑް އިންފްރާސްޓްރަކްޗަރ، މިނިސްޓްރީ އޮފް ހައުސިން އެންޑް އާބަން ޑިވެލޮޕްމަންޓް، މިނިސްޓްރީ އޮފް ޔޫތު އެންޑް ސްޕޯޓްސް ކޮމިއުނިޓީ އެމްޕަވާމަންޓް، މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސާވިސް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީއެވެ.
މާރިޔާ ވިދާޅުވީ ރައީސް ޢަބްދުﷲ ޔާމީން ސަރުކާރުގައި މިނިސްޓްރީތައް މަދުކަމަށް ވިޔަސް އެތަންތަނުގައި ސިޔާސީ މަޤާމްތަކުގައި ތިއްބެވި ބޭފުޅުންގެ ޢަދަދު 700 އަށް އަރާ ކަމަށެވެ. އެހެންނަމަވެސް އިބްރާހީމް މުޙައްމަދު ޞާލިޙުގެ ސަރުކާރުގައި އެޢަދަދު މަދުވާނެ ކަމަށް ވެސް ވިދާޅުވިއެވެ. ސިޔާސީ މަޤާމްތަކަށް ކުރައްވާ ޚަރަދު މަދުވަނީ ސިޔާސީ މަޤާމްތައް މަދުކުރައްވައިގެން ކަމަށް މާރިޔާ ވިދާޅުވިއެވެ.
