ދިވެހި ރާއްޖޭގެ ޝަރުއީ ކޯޓެއްގެ ތެރޭގައި ނަގާފައިވާ ފޮޓޯތަކެއް ކަަމށް ބެލެވޭ ފޮޓޯ ތަކެއް ސޯޝަލްމީޑިއާގައި ދައުރުވަމުންދާތީ އެމައްސަލަ ތަހުގީގު ކުރަމުންދާ ކަމަށް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޖީޑީއޭ) އިން ބުނެފިއެވެ. މި މައްސަލަ އާ ގުޅޭގޮތުން ޖީޑީއޭ އިން މިއަދު ނެރުނު ނޫސްބަޔާނުގައި އެ ޢަމަލު ކުށްވެރިކޮށް، ކޯޓުގެ ޙުރުމަތް ގެއްލޭފަދަ އެއްވެސް ޢަމަލެއް އެއްވެސް ފަރާތަކުން ނުކުރުމަށް އިލްތިމާސް ކޮށްފައިވެއެވެ.
އެ ބަޔާނުގައި ވާ ގޮތުގައި، "ޝަރުޢީ އެއްވެސް ކޯޓެއްގެ އެތެރެ ފޮޓޯ ނެގުމާއި ވީޑިއޯ ކުރުމަކީ، ކޯޓުގެ ޙުރުމަތް ރައްކާތެރި ކުރުމާބެހޭ ޤަވާއިދުގެ 4ވަނަ މާއްދާގެ (ހ) ގެ 8، 9، 13(ހ)، އަދި 15ވަނަ ނަންބަރުގެ ދަށުން ބަލާއިރު، ކޯޓުގެ ޙުރުމަތް ކެނޑުމުގެ ޢަމަލަކަށްވާތީ، އެ ޢަމަލަު ކުށްވެރިކޮށް އަދި ކޯޓުގެ ހައިބަތާއި ކަރާމާތާއި ޤަދަރަށް އުނިކަން އަތުވެދާ ފަދަ އެއްވެސް ޢަމަލެއް އެއްވެސް ފަރާތަކުން ނުކުރުމަށް" އަންގާފައިވެއެވެ.
އަދި ސޯޝަލްމީޑިއާގައި ދައުރުވާ ފޮޓޯއަކީ ކޯޓުގެ ޙުރުމަތް ކެނޑުމުގެ ޢަމަލަކަށްވާތީ ކަމާ ބެހޭ ހުރިހާ އިދާރާތައް ގުޅިގެން އެމައްސަލަ ތަހުގީގުކޮށް އަޅަންޖެހޭ ފިޔަވަޅުތައް އެޅުމަށް މަސައްކަތް ކުރަމުންދާ ކަމަށްވެސް އެބަޔާނުގައި ވެއެވެ.
