ރާއްޖޭގެ ކުރީގެ ރައީސުލްޖުމްހުރިއްޔާ އަދި އެމްޑީޕީގެ ރައީސް މުޙައްމަދު ނަޝީދު އއ. އުކުޅަހަށް ފުރައިވަޑައިގެންފިއެވެ.
މިއީ އެމަނިކުފާނުގެ ސަޕޯޓަރުންނާއި އެމްޑީޕީގެ މެމްބަރުނާ ބައްދަލު ކޮށްލެވުމަށް ކުރައްވާ ދަތުރުފުޅެކެވެ. މިދަތުރުފުޅުގައި ވެސް އެމަނިކުފާނުގެ އަނބިކަނބަލުން ލައިލާ ޢަލީ ބައިވެރިވެ ވަޑައިގަންނަވައެވެ. އަދި އެމްޑީޕީގެ އިސް ބައެއް ބޭފުޅުންވެސް ބައިވެރިވެ ވަޑައިގަންނަވައެވެ.
ރައީސް ނަޝީދަށް މަރުޙަބާ ދެންނެވުމަށް އުކުޅަހުގައި ތިއްބަވާ އެމަނިކުފާނަށް ތާއިދުކުރާ މީހުން ވަނީ ތައްޔާރުވެފައެވެ.
ރާއްޖެއިން ބޭރުގައި ތިން އަހަރެއްހާ ދުވަހު ހުންނެވުމަށްފަހު ރައީސް ނަޝީދު ރާއްޖެވަޑައިގެންނެވީ މިހިނގާ ނޮވެމްބަރު މަހު އެކެއްގައެވެ. އެއަށްފަހު އެމަނިކުފާނު ވަނީ އައްޑޫ ސިޓީއަށް ވަޑައިގެން އެމަނިކުފާނުގެ ސަޕޯޓަރުންނާ ބައްދަލު ކުރައްވައިފައެވެ. ހއ. ދިއްދުއަށް ވެސް އެމަނިކުފާނު ވަނީ ވަޑައިގެންފައެވެ.
މިއަދު އެމަނިކުފާނު ވަޑައިގަންނަވާ އުކުޅަހަކީ އެމްޑީޕީއަށް ބޮޑު ތާއިދެއް އޮންނަ ރަށެކެވެ. ކުރިއަށްއޮތް ތަނުގައި ރައީސް ނަޝީދު އިތުރު ރަށްރަށަށް ވަޑައިގެންނެވުމަށްވަނީ ހަމަޖެހިފައެވެ.
